Վարդան Մինասյան. Հայաստանի հավաքականն ուժեղ է ինչպես երբեք, և առաջին հերթին խաղում է հանուն երկրի

 25 նոյեմբերի 2011 - 16:01 AMT

PanARMENIAN.Net - «2012թ. մեր հավաքականը 4 ընկերական խաղ կանցկացնի, սակայն, ես դեռևս չգիտեմ, թե ովքեր են լինելու մեր մրցակիցները: Փետրվարին, հավանաբար, երկու խաղ կանցկացնենք: ԶԼՄ-ները գրում են, որ մեր մրցակիցը կլինի Բելառուսի հավաքականը, սակայն, ես դեռևս նման տեղեկատվություն չունեմ»,-նոյեմբերի 25-ին Երևանում լրագրողներին է ասել Հայաստանի ֆուտբոլի ազգային հավաքականի գլխավոր մարզիչ Վարդան Մինասյանը:

Ըստ Մինասյանի, 2011-ին Հայաստանի ազգային հավաքականը տարվա հայտնություն դարձավ և կարողացավ իր հաղթանակներով ուրախություն պարգևել բոլոր հայերին: «Ես վստահ եմ, որ Հայատանի 2011թ. լավագույն ֆուտբոլիստ կճանաչվի հավաքականի անդամներից մեկը, սակայն, ես ոչ ոքի օգտին չէի քվեարկի, քանի որ գտնում եմ, որ մեր հավաքականն առաջին հերթին ուժեղ է որպես մեկ միասնական թիմ: Իմ բոլոր սաները խաղում են հանուն իրենց երկրի ու հաղթանակի»:

Հայաստանի ֆուտբոլի ազգային հավաքականի գլխավոր մարզիչը նոյեմբերի 28-29 Չեխիայում կմասնակցի ԱԱ-2014 B խմբի օրացույցի քննարկմանը: Վարդան Մինասյանը գտնում է, որ այդ խումբը շատ ավելի ուժեղ է, քան Եվրո-2012 խումբը: «Մեր խմբից Իտալիան, Չեխիան ու Դանիան ունեն երիտասարդ ֆուտբոլիստներ: Բացի այդ, նրանք բոլոր կխաղան Եվրո-2012 եզրափակչում, որը կավելացնի նրանց փորձն ու խաղային պրակտիկան»,-ասել է Մինասյանը: