60-ականների աստղ Էնգելբերտ Համփերդինքը «Եվրատեսիլ 2012» Մեծ Բրիտանիայի ներկայացուցիչն է

2 մարտի 2012 - 14:07 AMT

PanARMENIAN.Net - Անցյալ դարի 60-70-ականների հայտնի երգիչ Էնգելբերտ Համփերդինքը ներկայացնելու է Մեծ Բրիտանիան Բաքվում կայանալիք «Եվրատեսիլ 2012» երգի մրցույթում: Ինչպես հայտնում է մրցույթի պաշտոնական կայքը, երգն ավելի ուշ է ներկայացվելու ունկնդիրներին: Այն ձայնագրվելու է Լոնդոնում, Լոս Անջելեսում և Նեշվիլում: Երգի հեղինակներն են Գրեմմիի դափնեկիր Մարտին Թերեֆեն և Սաշա Սքարբեքը:

Մրցույթը հեռարձակող BBC հեռուստաալիքի տնօրեն Դերեք ՄաքԼինն ասել է. «Էնգելբերտն ունի աննկարագրելի երաժշտական ժառանգություն և պատմություն, մասնավորապես Մեծ Բրիտանիայում և Եվրոպայում: Նա աշխատում է ոլորտի լավագույն հեղինակների հետ: Մենք հպարտ ենք ներկայացնել նրան մրցույթում»: Մինչ այդ լուրեր էին պտտվում, որ Մեծ Բրիտանիան ներկայացնելու է Atomic Kitten խումբը:

Հիշեցնենք, որ հայ էստրադային երգիչները բոյկոտում են մրցույթը, և չեն ցանկանում գնալ Բաքու: Փոխարենը մի քանի օտարազգիներ ցանկանում են ներկայացնել Հայաստանն այդ մրցույթում: Ադրբեջանական Էլլա և Նիկկի դուետը 2011թ-ի մայիսի 15-ին դարձավ Եվրատեսիլի հաղթող: Երկրորդ տեղը գրավեց իտալացի մասնակից Ռաֆայել Գուալազզին Madness Of Love երգով, իսկ երրորդ տեղում է Էրիկ Սաադը Շվեդիայից Popular երգով: Մայիսի 10-ին Դյուսելդորֆում կայացավ «Եվրատեսիլ 2011» մրցույթի առաջին կիսաեզրափակիչը: Էմմին հանդես եկավ 4-րդ համարի տակ և մրցույթում ներկայացրեց «Boom-Boom» երգը և չանցավ եզրափակիչ փուլ:

Հայաստանը մի քանի ամիս որոշում էր, մասնակցե՞լ Բաքվում կայանալիք մրցույթին, թե ոչ: Հանրային հեռուստաընկերությունը Բաքվից և Եվրոպական հեռարձակողների միությունից (EBU) անվտանգության լուրջ երաշխիքներ էր պահանջում: Հունվարի 17-ին EBU-ն մրցույթի պաշտոնական կայքում տեղադրեց մրցույթի մասնակից երկրների ցանկը, որտեղ նշված է նաև Հայաստանի անունը: Հայաստանի պատվիրակության ղեկավար Գոհար Գասպարյանը Հայաստանը Եվրոպական հեռարձակողների միության լիիրավ անդամ է և Բաքվում կայանալիք մրցույթին մասնակցելը դրա ապացույցն է:

«Եվրատեսիլ 2012»-ի կիսաեզրափակիչ փուլերը կայանալու են մայիսի 22-ին և 24-ին, եզրափակիչը` մայիսի 26-ին: Հայաստանը ելույթ է ունենալու երկրորդ կիսաեզրափակիչում`Սերբիայի, Շվեդիայի, Վրաստանի, Նիդեռլանդների, Պորտուգալիայի, Սլովենիայի, Մակեդոնիայի, Էստոնիայի, Բելառուսի, Թուրքիայի, Մալթայի, Սլովակիայի, Խորվաթիայի, Նորվեգիայի, Ուկրաինայի, Հայաստանի, Լիտվայի, Բուլղարիայի, Բոսնիա և Հերցեգովինայի հետ: