«ԹԻՎ ԵՐԿՈւ ԱՀԱԲԵԿԻՉ» ԽԱԹԹԱԲԸ ՖԻՆԱՆՍԱՎՈՐՎԵԼ Է ԱԴՐԲԵՋԱՆԻՑ

PanARMENIAN.Net - «Էխո Մոսկվի» ռադիոկայանին տրված հարցազրույցում Ռուսաստանի նախագահի օգնական Սերգեյ Յաստրժեմբսկին հայտարարել է, որ հատուկ ծառայություններն իրենց տրամադրության տակ ունեն անհերքելի փաստեր, որոնք ապացուցում են «Միջազգային Բարեգործական հիմնադրամ»-ի` Բաքվի գրասենյակի սերտ կապերը չեչեն ահաբեկիչների առաջնորդների հետ: Մասնավորապես պարզվել է, որ Չեչնիայում ֆեդերալ ուժերի դեմ կռվող մուսուլման վարձկանները ֆինանսավորվում են Բաքվից: Հիմնադրամի ադրբեջանական գրասենյակի հաշվի համարին կուտակվել են գումարներ` հրամանատար Խաթթաբի զինվորների համար: Բացի այդ, Յաստրժեմբսկու հավաստմամբ, հորդանանյան ահաբեկիչը Բաքվից նաեւ ստացել է մեծ քանակությամբ պայթուցիկներ, կապի միջոցներ եւ տարատեսակ սարքավորումներ:

Հիշեցնենք, որ չեչեն գրոհայիններին եւ «Ալ Քաիդայի» ահաբեկիչներին ֆինանսավորող «Միջազգային Բարեգործական հիմնադրամը» Բաքվում իր մասնաճյուղը բացել է 8 տարի առաջ: Այս կառույցը քողարկվում է բարեգործական կազմակերպության անվան տակ: Չիկագոյում գտնվող գլխավոր գրասենյակից ամեն ամիս Ադրբեջան են փոխանցվել հսկայական գումարներ: Երբ հաստատվեցին «Ալ Քաիդայի» հետ կապի մասին տեղեկությունները, «Միջազգային Բարեգործական հիմնադրամի» ղեկավարը ձերբակալվեց: Հայտնաբերվեցին եւ սառեցվեցին Միացյալ նահանգներում, Մեծ Բրիտանիայում, Կանադայում եւ այլ պետություններում գտնվող հիմնադրամի ներկայացուցիչների բանկային հաշիվները: Հիմնադրամի տարածաշրջանային կառույցները փակվեցին, իսկ նրանց ղեկավարները պատասխանատվության ենթարկվեցին:

Սակայն Բաքվում «Միջազգային Բարեգործական հիմնադրամի» մասնաճյուղը չդադարեցրեց իր գործունեությունը նույնիսկ այն բանից հետո, երբ Միացյալ ազգերի կազմակերպությունն այս հիմնադրամը ներառեց «Ալ Քաիդայի» հետ կապեր ունեցող կազմակերպությունների ցուցակում: Ադրբեջանի իշխանությունների չմիջամտելը հակասում է Անվտանգության խորհրդի 1999թ.-ին ընդունած թիվ 1267 բանաձեւին: Այն իշխանություններից պահանջում է կասցենել միջազգային ահաբեկչությանն աջակցող կառույցների գործունեությունը: Նոյեմբերի 25-ին Անվտանգության խորհրդի հանձնաժողովը տարածել է հայտարարություն, որտեղ նշված է «Միջազգային Բարեգործական հիմնադրամի» մասնաճյուղի կոնկրետ հասցեն` Բաքու, Բաշիր Սաֆարօղլու փողոց, տուն 29: Այս փաստն ամենեւին չի ազդել Ադրբեջանի իշխանությունների վրա, որոնք ոչ մի կոնկրետ քայլ չեն ձեռնարկեցել ծայրահեղական կառույցի ճյուղավորման գործունեությունը դադարեցնելու համար: Բաքվի մասնաճյուղի ղեկավարները լրագրողներին հավաստում են, որ «Ադրբեջանի ղեկավարների կողմից ոչ մի ճնշման չեն հանդիպել»:

Պաշտոնական Բաքվի տարօրինակ պահվածքն այժմ ոչ միայն Արեւմուտքի, այլեւ` Ռուսաստանի զարմանքն է հարուցում: Ադրբեջանը մշտապես փորձում է միջազգային հանրությանը ցուցադրել, թե պատրաստ է մասնակցել միջազգային ահաբեկչության դեմ պայքարին, այնինչ` «Միջազգային Բարեգործական հիմնադրամի» դեպքը հստակորեն պատկերում է, որ իրականում այս երկիրը հովանավորում է ծայրահեղական կառույցներին, որոնք առանց որեւէ խոչընդոտի հանդիպելու շարունակում են գործել երկրի սահմաններում: