Ս. Սարգսյան. Ադրբեջանի կողմից հրադադարի խախտումը պատահականություն չէ

PanARMENIAN.Net - Ադրբեջանի կողմից Ղարաբաղի դիրքերի վրա հարձակումը նախապատրաստված էր: Այդ մասին հայտարարել է նորընտիր նախագահ, Հայաստանի վարչապետ Սերժ Սարգսյանը: «Վստահ եմ, որ հրադադարի խախտումը Ադրբեջանի կողմից, պատահականություն չէ, սակայն դժվարանում եմ այժմ պատասխանել` ինչպես է դա կապված Հայաստանի ներքաղաքական իրադրության հետ: Սակայն գրոհը Բաքվի կողմից նախապատրաստված էր, եւ դրան տեղյակ էր Ադրբեջանի գերագույն ղեկավարությունը»,- նշել է վարչապետը:



Նրա խոսքերով, այդ մասին է վկայում այն փաստը, որ Ադրբեջանի պաշտպանության նախարարը, ում հետ նա բանակցում էր ԵԱՀԿ հատուկ ներկայացուցիչ Անջեյ Կասպրշիկի միջոցով, հրաժարվել է ետ կանչել իր ուժերը:



«Ադրբեջանի պաշտպանության նախարարը տեղյակ էր, որ իր զորքերը տեղաշարժվել են, եւ այդ մասին է վկայում այն փաստը, որ նա հրաժարվել է ետ կանչել իր ուժերը: Փառք ու պատիվ մեր զինվորներին, ովքեր առանց որեւէ զոհի կարողացան ապացուցել ինչն-ինչոց է»,- ասել է Սարգսյանը, հաղորդում է «Նովոստի-Արմենիան»:



Մարտի 3-ի լույս 4-ի գիշերը Ադրբեջանի ԶՈՒ գրոհային խմբավորումը, խախտելով հրադադարի ռեժիմը, հարձակվել է ԼՂՀ Պաշտպանության բանակի դիրքերից մեկի վրա Մարտակերտի շրջանի Լեւոնարխ գյուղի մերձակայքում եւ ժամանակավորապես իր վերահսկողության տակ է առել այդ հենակետը, սակայն պատասխան գործողությունների արդյունքում ադրբեջանցիները ետ են մղվել նախկին դիրքերին, կրելով էական կորուստներ: Ղարաբաղի ԱԳՆ-ն պահանջել է ճգնաժամ-դիտարկում անցկացնել ԵԱՀԿ առաքելության կողմից, որը ծրագրվում է անցկացնել մարտի 7-ին, սակայն դիտարկումը հետաձգվել է ադրբեջանական կողմի մեղքով: