Հայաստանի ոստիկանությունը փորձել է խոչընդոտել երթը դեպի ԱՄՆ դեսպանատուն

PanARMENIAN.Net - ՀՀ ոստիկանությունը փորձել է խոչընդոտել «Ժառանգություն» կուսակցության կազմակերպած երթը դեպի Երեւանում ԱՄՆ դեսպանատուն: Մայորի կոչումով ոստիկանության ներկայացուցիչը հայտարարեց, որ երթի անցկացման համար համապատասխան թույլտվություն չկա, եւ բացի դրանից, ցուցարարնեն իրենց գործողություններով կարող են խախտել հասարակական կարգը եւ խանգարել քաղաքային երթեւեկությունը: Ակցիայի մասնակիցների նախաձեռնող խումբը, հիմնվելով գոյություն ունեցող օրենսդրության վրա, պնդում էր առանց հատուկ թույլտվության նման ակցիաներ կազմակերպելու իր իրավունքը: Փոխզիջման գնացին այն ժամանակ, երբ հատուկ ոստիկանության ներկայացուցիչների համար անցկացված վերահաշվարկի արդյունքում պարզվեց, որ երթի մասնակիցների թիվն անցնում է 50-ից, եւ հայտարարվեց, որ շարժումը կիրականացվի միայն մայթերով: Երթը սկսվեց 40 րոպե ուշացումով:



«Ժառանգություն» կուսակցության երթը նվիրված է Հայոց ցեղասպանության 94-ամյա տարելիցին: Ակցիայի մասնակիցները մտադիր են ԱՄՆ դեսպանատան աշխատողներին հանձնել ԱՄՆ նախագահ Բարակ Օբամային ուղղված նամակը, որում կոչ է արվում ամերիկյան նախագահին կատարել իր նախընտրական խոստումը եւ ճանաչել Հայոց ցեղասպանությունը, որն իրականցվել է թուրքական իշխանությունների կողմից 1915-1923թթ.:



Օսմանյան կայսրության 1915-1923թթ. Հայոց ցեղասպանությունը ճանաչել են շուրջ 20 երկրներ, որոնց թվում են Արգենտինան, Բելգիան, Վատիկանը, Վենեսուելան, Գերմանիան, Հունաստանը, Կանադան, Կիպրոսը, Լիբանանը, Լիտվիան, Նիդերլանդները, Լեհաստանը, Ռուսաստանը, Սլովակիան, Ուրուգվայը, Ֆրանսիան, Չիլին, Շվեյցարիան: Օսմանյան կայսրությունում 1915-1917թթ. Հայոց ցեղասպանության փաստը 1987-ի հուլիսի 18-ին ընդունած բանաձեւով ճանաչել է Եվրախորհրդարանը: