Արմեն Հարությունյան. Ժամանակավոր հանձնաժողովը պաշտպանում է դատախազությանը

PanARMENIAN.Net - Երեւանում 2008 թվականի մարտի 1-ի իրադարձությունների հետաքննման ժամանակավոր խորհրդարանական հանձնաժողովն իր զեկույցում բավականին ներողամտորեն է վերաբերվել դատախազությանը: Այդ մասին Երեւանում կայացած մամլո ասուլիսի ժամանակ հայտարարել է Հայաստանի մարդու իրավունքների պաշտպան Արմեն Հարությունյանը : Նրա խոսքերով, անցած տարվա իրադարձությունների մասին իր զեկույցում հանձնաժողովը սկզբից մինչեւ վերջ պաշտպանում է դատախազությանը: «Հիմնականում հանձնաժողովի անդամները քննադատում են ոստիկանությանը, հատուկ քննչական ծառայության մասին նրանք պարզապես հիշատակում են, իսկ դատախազության մասին ընդհանրապես լռում են», - ասել է օմբուդսմենը: Նա նաեւ նշել է, որ զեկույցում հանձնաժողովը չի նշել քննիչների խախտումները, որպես օրինակ մատնանշելով Մյասնիկ Մալխասյանի սեփականության օտարման մասին քննիչի նամակը: Հարությունյանը նաեւ ընդգծել է, որ հանձնաժողովը զեկույցում կոշտ դիրքորոշմամբ հանդես չի եկել 10 մարդու մահվան առնչությամբ: «Զեկույցի գլխավոր թերությունն այն է, որ վերջինս զուրկ է որոշակիությունից», - ասել է իրավապաշտպանը:



Բացի զեկույցի բացասական կողմերից, Հարությունյանն ընդգծել է նաեւ դրական կողմերը, ասելով, որ վերջինում հիշատակվում են բոլոր կարեւոր փաստերը. զենքի առկայությունը, մարդկանց ծեծի ենթարկելը:



«Որոշ դրույթներում միակողմանի լինելով` զեկույցը բավականին օբյեկտիվ է», - նշել է Արմեն Հարությունյանը, ավելացնելով, որ հանձնաժողովի հաստատմամբ անցած տարվա իրադարձությունների հիմնական պատճառները կրում են համակարգային եւ ինստիտուցիոնալ բնույթ. իշխանության չափազանց կենտրոնացումը, հասարակությունում վերին շերտի առկայությունը: Այս ամենի իրական մեղավորը Հայաստանի իշխանություններն են, եւ այդ իրավիճակի առնչությամբ որոշում նույնպես նրանք պետք է կայացնեն: