![ԱՄՆ Միջազգային զարգացման գործակալությունը մտադիր է զարգացնել Հայաստանի խորհրդարանի կարողությունները ԱՄՆ Միջազգային զարգացման գործակալությունը մտադիր է զարգացնել Հայաստանի խորհրդարանի կարողությունները](https://media.pn.am/media/issue/43/244/photo/268x180_thumb_photo_43244_e748ad8d0.jpg)
5 փետրվարի 2010 - 21:57 AMT
PanARMENIAN.Net -
Փետրվարի 5-ին ՀՀ Ազգային ժողովի նախագահ Հովիկ Աբրահամյանը եւ ԱՄՆ Միջազգային զարգացման գործակալության (USAID) հայաստանյան առաքելության տնօրեն Ջաթինդեր Չիման ստորագրեցին փոխըմբռնան հուշագիր: Ստորագրման արարողությանը ներկա էին ԱԺ աշխատակազմի ղեկավարը, պատգամավորներ, ՀՀ-ում ԱՄՆ-ի դեսպան Մարի Յովանովիչը:
Ստորագրված հուշագիրը հաստատում է երկու կողմերի համագործակցության պատրաստակամությունը եւ նպատակ ունի բարձրացնել օրենսդիր իշխանության դերը եւ զարգացնել խորհրդարանի կարողությունները: Փաստաթղթով նախատեսվում է իրականացնել օրենսդրական բարեփոխումներ, զարգացնել Ազգային ժողովի տեղեկատվական, փորձագիտական, վերլուծական եւ հետազոտական հնարավորությունները, կատարելագործել խորհրդարանի վերահսկողական գործառույթը, պատգամավորներին եւ աշխատակազմին միջազգային փորձն ուսումնասիրելու հնարավորություն ընձեռել:
Հուշագրով սահմանված նպատակները եւ միջոցառումները իրագործելու համար նախատեսվում է ձեւավորել աշխատանքային խումբ, հաղորդում է ՀՀ ԱԺ հասարակայնության եւ տեղեկատվության միջոցների հետ կապերի վարչությունը: