![Հայաստանն ու Սերբիան բավարարված են քաղաքական երկխոսության բարձր մակարդակով Հայաստանն ու Սերբիան բավարարված են քաղաքական երկխոսության բարձր մակարդակով](https://media.pn.am/media/issue/44/584/photo/268x180_thumb_photo_44584_82d6d16e0.jpg)
24 փետրվարի 2010 - 21:49 AMT
PanARMENIAN.Net -
Փետրվարի 24-ին Հայաստանի ԱԳ նախարար Էդվարդ Նալբանդյանն ընդունեց քաղաքական խորհրդատվությունների մասնակցելու նպատակով Հայաստան ժամանած Սերբիայի ԱԳՆ պատվիրակությանը` նախարարի առաջին տեղակալ Միրկո Ստեֆանովիչի գլխավորությամբ:
Հանդիպմանը երկուստեք գոհունակություն հայտնվեց երկու երկրների միջեւ հաստատված բարեկամական հարաբերությունների, բարձր մակարդակի քաղաքական երկխոսության եւ տնտեսական կապերի ակտիվացման ուղղությամբ ձեռնարկվող քայլերի առնչությամբ: Զրուցակիցները քննարկեցին 2009 թ. Սերբիայի Նախագահի Հայաստան կատարած այցելության ընթացքում երկու երկրների ղեկավարների միջեւ ձեռք բերված պայմանավորվածությունների կատարման ընթացքը: Կողմերը բարձր գնահատեցին արտաքին քաղաքական գերատեսչությունների միջեւ նույն օրը կայացած խորհրդատվությունների արդյունքները, որոնց ընթացքում քննարկվել են երկկողմ օրակարգի հարցերի լայն շրջանակ:
Էդվարդ Նալբանդյանն ու Միրկո Ստեֆանովիչը մտքեր փոխանակեցին Կովկասում եւ Բալկաններում վերջին զարգացումների, երկուստեք հետաքրքրություն ներկայացնող մի շարք տարածաշրջանային եւ միջազգային հարցերի շուրջ, հաղորդում է ՀՀ ԱԳՆ մամլո ծառայությունը: