Հայաստան կժամանի Սլովակիայի Ազգային խորհրդի նախկին նախագահ Պավոլ Հրուշովսկին

PanARMENIAN.Net - Ապրիլի 14-ին Հայաստան է ժամանում Սլովակիայի Ազգային խորհրդի (ԱԽ) նախկին նախագահ, ներկայումս ԱԽ-ի Քրիստոնեադեմոկրատական խմբակցության նախագահ Պավոլ Հրուշովսկին, որի նախագահության օրոք 2004թ-ի նոյեմբերի 30-ին Սլովակիայի ԱԽ-ն ընդունեց Հայոց Ցեղասպանության հաստատման բանաձևը: Այս մասին հայտնում է Եվրոպայի Հայկական միությունների ֆորումի (ԵՀՄՖ) մամլո քարտուղարությունը: Հրուշովսկին Հայաստան կժամանի ԵՀՄՖ-ի և Սլովակիայի հայ համայնքի նախագահ Աշոտ Գրիգորյանի ուղեկցությամբ

Օրերս Ա. Գրիգորյանի հետ ունեցած երկխոսության ընթացքում Պավոլ Հրուշովսկին նշել է, որ Թուքիայի վարչապետ Էրդողանի հայտարարությունները զարմացնում և զայրացնում են ցեղասպանության բանաձևն ընդունած խորհրդարանների պատգամավորներին: Ըստ Հրուշովսկու, “Թուրքիայի վարչապետն իրավունք չունի մեղադրական կարծիքներ շպրտելու Եվրոպայի անկախ երկրների խորհրդարանների հասցեին`Թուրքիայի կողմից իրագործված ցեղասպանությանը քաղաքական գնահատական տալու հետ կապված”:

“Սլովակիայի ԱԽ-ն, հաստատելով Հայոց ցեղասպանության անառարկելի պատմական փաստը, քննարկել է դրան քաղաքական գնահատական տալու անհրաժեշտությունը և արդյունքում` առանց դեմ քվեի հաստատել է այն”,-ասել է Սլովակիայի Ազգային Խորհուրդի (ԱԽ) նախկին նախագահը:

Ա. Գրիգորյանը նույնպես հաստատեց, որ Սլովակիայի Ազգային Խորհուրդը մեծ լրջությամբ էր պատրաստվել Հայոց Ցեղասպանության բանաձևի ընդունմանը և, բանաձևն ընդունվել էր առանց դեմ քվեի, որն ինքնին չափազանց խոսուն փաստ է: Սլովակիայի Ազգային Խորհուրդի 2004 թվին ընդունած բանաձևը Հայոց ցեղասպանության վերաբերյալ. Սլովակիայի Ազգային Խորհուրդը ընդունում է 1915թ-ին Օսմանյան Թուրքիայում կատարված ցեղասպանության փաստը, որի ժամանակ սպանվել են Օսմանյան կայսրության հպատակ հարյուր հազարավոր հայեր և կատարվածը համարում է ոճիր ընդդեմ համայն մարդկությանը: Սլովակիայի ԱԽ-ը նշում է, որ.

1. Թուրքիան մինչև այսօր չի ընդունել 1915թ.-ին կատարված Հայոց ցեղասպանությունը,

2. ՀՀ անկախության պահից մինչև այսօր Թուրքիան ամբողջովին շրջափակել է հայկական սահմանը: Հայաստանը զրկվել է Եվրոպայի հետ ամենակարճ ճանապարհից և չունի Թուրքիայի հետ դիվանագիտական ու տնտեսական հարաբերություններ,

3. Թուրքիայի պառլամենտը ընդունել է օրենք, ըստ որի քրեական գործ է հարուցվում Հայոց ցեղասպանության մասին խոսողների դեմ,

4.Թուրքիայում ապրող հայկական փոքրամասնության իրավունքները ենթարկվում է համակարգված ճնշման: Այս բանաձևը ներկայացվել է քննարկման Սլովակիայի ԱԽ-ում Թուրքիայի Եվրամիության թեկնածու անդամ դառնալու քվեարկության ընթացքում և ընդունվել է որպես ԵՄ-ին անդամակցության նախապայման: