Ռուբեն Հախվերդյան. Այնպիսի տպավորություն է, որ ՀՀ իշխանությունները ցուցումների են սպասում Ռուսաստանից

PanARMENIAN.Net - Այնպիսի տպավորություն է, որ Հայաստանի իշխանությունները ցուցումների են սպասում Ռուսաստանից երկրի ճակատագիրը լուծելու համար: Այդ մասին Երևանում կայացած մամլո ասուլիսում հայտարարել է հայտնի երգիչ, երգահան Ռուբեն Հախվերդյանը: «Տպավորություն է ստեծվում , որ Հայաստանի նախորդ և ներկա իշխանությունները մեկ նպատակ էին հետապնդում՝ քանդել երկիրը, սակայն, քանդելով, ոչինչ չկառուցեցին,-ասել է նա:-Քանի դեռ երկրի ղեկավարությունը խորհրդային մտածելակերպ ունի, ոչինչ չի փոխվի»:

Նա նշել է նաև, որ ՀՀ նախագահ Սերժ Սարգսյանն ասելով, որ ամեն ինչ հարկավոր է նոր էջից սկսել, առաջին հերթին պետք է ինքն իրենից սկսի, քանի որ, ըստ Հախվերդյանի, «Սարգսյանը ևս այդ կոռումպացված աշխարհի մասն է հանդիսանում»:

Հախվերդյանը հավելել է նաև, որ չի մասնակցելու առաջիկա 2012-13թթ. խորհրդարանական ու նախագահական ընտրություններին, քանի որ վստահ է, որ դրանք կեղծվելու են:

Նա ընդգծել է, որ մտավորականության ճշմարիտ ներկայացուցիչ է համարում միայն «Սարդարապատ» շարժման նախաձեռնող խմբի անդամ Ժիրայր Սեֆիլյանին:

Իր հերթին երգիչ, երգահան Դավիթ Ամալյանն, անդրադառնալով Հայաստանի էստրադային կյանքին, ասել է, որ ժողովուրդը հիշեց հայ էստրադային երգիչների ցածր որակի մասին միայն այն ժամանակ, երբ նրանց բնակարաններ նվիրեցին «Տաշիր-2011» մրցանակաբաշխության ժամանակ: «Սակայն, հավանաբար, մարդիկ մինչ այդ չէին նկատել երաժշտության կամ երգերի տեքստերի ցածր որակը, որոնք հեռարձակվում են հայկական հեռուստաալիքներով»,-նշել է Ամալյանը: