Իրանահայ համայնքի ջանքերով Նռնաձոր համայնքում շահագործման հանձնվեց նորակառույց ջրամատակարարման համակարգը

PanARMENIAN.Net - 2007թ-ից սկսած իրանահայ համայնքի հովանավորությամբ «Հայաստան» համահայկական հիմնադրամը ծրագրեր է իրականացնում Սյունիքի մարզի Նռնաձոր համայնքում: Այս գործունեության շրջանակներում նոյեմբերի 4-ին Թեհրանի հայոց թեմի Թեմական խորհրդի հովանավորությամբ Հիմնադրամը համայնքի շահագործմանը հանձնեց նորակառույց ջրամատակարարման համակարգը, որը թվով վեցերորդ ծրագիրն է այս գյուղում:

Համակարգն ունի 4,3կմ երկարությամբ ջրատար, 2 ջրամբար, պոմպակայան եւ ջրամատակարարման ներքին ցանց, որի միջոցով ջուրը հասցվել է գյուղի 50 տնտեսություններին: «Բազմաթիվ խնդիրներ ունեցող այս գյուղում ապրելով` դուք պաշտպանում ու ամրացնում եք հայրենիքի սահմանները, եւ դա այսօր, ինքնին, հերոսություն է: Շարունակեք ապրել ձեր հողում ու շենացրեք այն՚»- ողջույնի իր խոսքում ասաց Թեհրանի հայոց թեմի Թեմական խորհրդի ատենապետ Աիդա Ավանեսյանը:

Հիմնադրամի ծրագրերի եւ արտաքին կապերի բաժնի պետ Վարդան Փարթամյանը նշեց.«Հիմնադրամի այս տարվա դրամահավաքի կարգախոսն է` ջուրը կյանք է: Սա պարզ ճշմարտություն է եւ համայնքի բնականոն զարգացումն անհնար է առանց ջրի: Շատ ուրախ ենք, որ Նռնաձորում այս կենսական խնդիրն այլեւս լուծված է»:

Միջոցառման ավարտին Իրանի մեր հայրենակիցները դպրոցական պայուսակներ նվիրեցին գյուղի 34 աշակերտներին եւ խոստացան հաջորդ այցին գրքեր նվիրել Նռնաձորի եւ հարեւան գյուղերի դպրոցական գրադարաններին:

Թեհրանի հայոց թեմի հոգածության շնորհիվ գյուղի կենտրոնական փողոցները լուսավորված են, համայնքն ունի տրակտոր, դպրոցականները արտաքին աշխարհի հետ կապը պահպանում են նորաբաց համակարգչային դասասենյակի միջոցով: Իսկ իրանահայ բարերարներ տեր եւ տիկին Արզումանյանների միջոցներով, ի հիշատակ Խաժակ Արզումանյանի, կահավորվել եւ ցանկապատվել է Նռնաձորի դպրոցը:

Սյունիքի մարզում ընթացքում են Կապանի բժշկական կենտրոնի մանկական բաժանմունքի մասնաշենքի հիմնանորոգումը եւ Գորիսի նորակառույց «Զանգեզուր» սրտաբանական կենտրոնի կահավորումը, ասվում է «Հայաստան» համահայկական հիմնադրամի մամլո հաղորդագրության մեջ: