Վիկ Դարչինյան-Նոնիտո Դոնեյր ռևանշ-մենամարտը չի կայանա

PanARMENIAN.Net - Վիկ Դարչինյանի և WBA վարկածով ժամանակավոր չեմպիոն Նոնիտո Դոնեյրի (Ֆիլիպիններ) միջև բանակցությունները ռևանշ-մենամարտի մասին, որոնք տևել են մեկուկես ամիս, մտել են փակուղի: Դարչինյանի մենեջեր Էլիաս Նասերը մեղքը գցում է Դոնեյրի թիմի վրա: «Մենք պայմանագիր ենք ստորագրել բանակցությունները սկսելուց 2 օր անց,- ասել է նա: - Մենք այսքան ժամանակ սպասել ենք, որ Դոնեյրը որոշի` ինչ է ուզում: Շատ հեշտ է ապացուցել, թե ով չի ուզում այս մենամարտը: Դա պայմանագիրը չստորագրած կողմն է»: Դարչինյանն ասել է. «Ես երկու վարկածներով չեմպիոն եմ և պարտավոր չեմ սպասել Դոնեյրին,- ասել է Դարչինյանը: - Ես ցանկանում եմ տիտղոսներ նվաճել 4-5 քաշային կարգերում և չեմ պատրաստվում ժամանակ ծախսել, քանի Արքայադուստր Նոնիտոն կորոշի` մենամարտ ցանկանում է, թե ոչ: Նոնիտոն գիտի, թե նրան ինչ է սպասում մեր հանդիպման դեպքում: Ես նրան նոկաուտի եմ ենթարկելու: Կարծում եմ` շատ խելացի է չհանդիպել մրցակցի հետ, որը կկործանի քո կարիերան»: «Ես ցանկանում եմ այս մենամարտում կրկին հաղթել Դարչինյանին: Նաև ցանկանում եմ երկրպագուներին ապացուցել, որ ես կրկին նոկաուտի կենթարկեմ նրան, ինչպես դա արեցի անցած անգամ,-նշել է Դոնեյրը:-Եկեք թողնենք այս խոսակցությունները և կազմակերպենք այս մենամարտը»:

«Super Six Boxing Classic» մրցաշարի մասնակիցների` միջին քաշային կարգում հայ բռնցքամարտիկ Արթուր Աբրահամի (Գերմանիա) և WBC վարկածով նախկին չեմպիոն բրիտանացի Կառլ Ֆրոչի միջև մենամարտը կարող է տեղի ունենալ Շվեյցարիայում: Դանիայում Միքել Կեսլերին պարտվելուց հետո Ֆրոչը հայտարարել է, որ Արթուրի հետ մենամարտն անցկացնելու է միայն իր հայրենիքում` Նոթինգհեմում (Անգլիա), այլապես նա կդադարեցնի մասնակցությունը մրցաշարին: Միևնույն ժամանակ Աբրահամի թիմի անդամները հայտարարել են Բեռլինում մարտն անցկացնելու հավանականության մասին: Ըստ պայմանագրի, Արթուր Աբրահամի և Կառլ Ֆրոչի մենամարտը պետք է տեղի ունենա Եվրոպայում, և այս դեպքում Շվեյցարիան կարող է չեզոք տարածք լինել, որը բավարարելու է երկու կողմերի պահանջները: Անկախ մարտն անցկացնելու համար տեղի ընտրությունից, հանդիպման ամսաթիվը` օգոստոսի 21-ը, դեռ մնում է անփոփոխ: Իսկ առաջին միջին քաշային կարգում հանդես եկող հայ բռնցքամարտիկ Վանես Մարտիրոսյանը (69,9 կգ) ռինգ դուրս կգա հունիսի 5-ին Բրոնքսում (ԱՄՆ, Նյու-Յորք նահանգ): Նրա մրցակիցը կլինի առայժմ անպարտելի ամերիկացի Ջո Գրինը:

Նադյա Ռաոիի (Գերմանիա) հանդեպ տարած հաղթանակից հետո հայ բռնցքամարտիկ Սյուզի Կենտիկյանը (Գերմանիա) պաշտպանել է WBA, WBO և WIBF վարկածներով տիտղոսները: Կենտիկյանն ասել է, որ մենամարտը նայել է հեռուստացույցով և կարծում է, որ Ռաոին լավ է բռնցքամարտել: “Ռինգում ես չէի զգում նրա ճնշումը: Անցյալ տարի ես հաղթել եմ 4 մրցակցուհիների, որոնք աշխարհի չեմպիոններ էին: Սակայն, այս անգամ ես լավագույն մարզավիճակում չէի”,- ասել է հայ բռնցքամարտիկը: Կենտիկյանի խոսքերով, նա հանդիպելու է Ռաոիի հետ ևս մեկ անգամ. «Նադյան խաղ-ռևանշ է ցանկանում, կարծում եմ, դա ուզում են նաև երկրպագուները: Բայց հիմա ես ցանկանում եմ միայն մարզվել և վերադառնալ իմ լավագույն մարզավիճակին: Ես գիտեմ, որ հաջորդ մենամարտում կազմ ու պատրաստ կլինեմ»,- ասել է Կենտիկյանը:

Շախմատ. FIDE-ն (Միջազգային շախմատային ֆեդերացիա) հրապարակել է աշխարհի 100 ուժեղագույն շախմատիստների ու շախմատիստուհիների անունները ըստ մինչև այս տարվա մայիս ամիսը ձեռք բերած արդյունքների: Հայ շախմատիստ, գրոսմայստեր Լևոն Արոնյանը 2783 միավորով 5-րդ հորիզոնականն է զբաղեցնում: 2813 միավորով մրցաշարային սանդղակը գլխավորում է Մագնուս Կարլսենը (Նորվեգիա): Վեսելին Տոպալովը (Բուլղարիա) 2-րդ տեղում է, նա Կարլսենին միայն մեկ միավորով է զիջում: Վլադիմիր Կրամնիկը (Ռուսաստան) 3-րդ տեղում է, իսկ հնդիկ գրոսմայստեր Վիշվանաթան Անանդը` 4-րդ: Կանանց վարկանիշային սանդղակում հայ շախմատիստուհիներից բարձր տեղ է զբաղեցնում Լիլիթ Մկրտչյանը, նա 13 հորիզոնականով իջել է և 2477 միավորով 26-րդն է: Էլինա Դանիելյանը (2473) իջել է 11 հորիզոնականով և 29-րդ տեղն է զբաղեցնում: Ապրիլի 25-ից մայիսի 8-ը Նալչիկում ընթանում է կանանց Գրան պրին: Մինչև մայիսի 6-ը կայացել է 9-րդ տուրը: Հայ շախմատիստուհիներ Լիլիթ Մկրտչյանը և Էլինա Դանիելյանը 9-րդ տուրից հետո հավաքել են համապատասխանաբար 4 և 1,5 միավորներ: Մկրըչյանը զբաղեցնում է 8-րդ տեղը, իսկ Դանիելյանը եզրափակում է մրցաշարային աղյուսակը: Թենիս. Երևանում ավարտվել է կանանց թենիսի Fed Cup-ի եվրոաֆրիկյան գոտու 2-րդ խմբի մրցաշարը: Հայաստանի հավաքականը Բ խմբում երեք պարտություն է կրել Վրաստանի, Նորվեգիայի և Ֆինլանդիայի հավաքականներից: Վճռական պայքարում հաղթելով ՀԱՀ հավաքականին` հայ թենիսիստուհիները կարողացան մնալ երկրորդ խմբում, որում խաղալու են 2011-ին: Առաջին խմբի ուղեգրեր նվաճել են Հունաստանի և Լյուքսեմբուրգի հավաքականները, իսկ Նորվեգիայի և ՀԱՀ հավաքականները դուրս են մնացել եվրոաֆրիկյան գոտու երկրորդ խմբից: Ծանրամարտ/b>. Մայիսի 16-23-ը Վալենսիայում տեղի է ունենալու Եվրոպայի պատանեկան առաջնություն, որտեղ հանդես են գալու 8 ծանրորդներ և 1 կին ծանրորդ: Պատանեկան հավաքականի ավագ մարզիչ Էդուարդ Կիզողյանը PanARMENIAN.Net ի թղթակցի հետ զրույցում հաղորդել է, որ անցկացրել են 3 ոուսումնամարզական հավաք: «Տարեսկզբին 2 հավաք անցկացրել ենք Ծաղկաձորում, իսկ արդեն մայիսի 3-ին մինչև առաջնությանը մեկնարկը մարզվելու ենք Աբովյանում: Կարծում եմ` իմ սաները լիովին պատրաստ են Եվրոպայի առաջնությանը»,- ասել է Կիզողյանը: