Գեւորգ Դավթյան. Հայ ծանրամարտիկները Հարավային Կորեայում ընթացող ԱԱ-ում հաղթելու բոլոր շանսերն ունեն

PanARMENIAN.Net - Նոյեմբերի 22-ին հայ ծանրամարտիկները կսկսեն իրենց ելույթները Գոյանգում (Հարավային Կորեա), որտեղ նոյեմբերի 17-ին արդեն մեկնարկել է ծանրամարտի Աշխարհի առաջնությունը: Հայաստանի հավաքականից առաջինը ելույթ կունենա այս տարվա Եվրոպայի չեմպիոն Առաքել Միրզոյանը (69 կգ):



Վնասվածքի պատճառով Գոյանգ չի մեկնել ամենաուժեղ ծանրամարտիկներից մեկը` Գեւորգ Դավթյանը (77 կգ ք/կ, 2006 եւ 2007թթ. Եվրոպայի չեմպիոն, 2007թ. աշխարհի արծաթե մեդալակիր, 2008թ. Օլիմպիական խաղերի բրոնզե մեդալակիր):



PanARMENIAN.Net ի թղթակցի հետ զրույցում Գեւորգ Դավթյանն ասաց, որ բոլոր հայ ծանրամարտիկները լավ են պատրաստվել եւ հաղթանակի բոլոր շանսերն ունեն: «Բոլոր հավաքները նորմալ են անցել, տղաները լավ ֆիզիկական պատրաստականություն ունեն: Լավագույնի հույսն ունենք»,- ասաց Դավթյանը:



Այս տարի այդ քաշային կարգում ելույթ կունենա Տիգրան Գ. Մարտիրոսյանը` 69 կգ ք/կ Եվրոպայի չեմպիոն, 2008թ. Օլիմպիական խաղերի բրոնզե մեդալակիր: «Տիգրանը միջազգային առաջնություններին մասնակցելու մեծ փորձ ունի, նա շատ ուժեղ մարզիկ է»,- ավելացրեց Դավթյանը:



Դավթյանի խոսքով, ինքն արդեն բուժել է մեջքի եւ ծնկի վնասվածքները եւ հուսով է, որ 2010-ին կկարողանա ելույթ ունենալ միջազգային առաջնություններում:



Հիշեցնենք, որ Հայաստանն աշխարհի առաջնությանը ներկայացնում են հետեւյալ մարզիկները`



Հայաստանի կանանց հավաքական`



Մելինե Դալուզյան - 63 կգ ք/կ (նոյեմբերի 25)

Նազիկ Ավդալյան - 69 կգ ք/կ (նոյեմբերի 27)

Հռիփսիմե Խուրշուդյան - 75 կգ ք/կ (նոյեմբերի 28)



Տղամարդկանց հավաքական`



Առաքել Միրզոյան - 69 կգ ք/կ (նոյեմբերի 22)

Տիգրա Գ. Մարտիրոսյան - 77 կգ ք/կ (նոյեմբերի 24)

Տիգրան Վ. Մարտիրոսյան - 85 կգ ք/կ (նոյեմբերի 26)

Գեւորիկ Պողոսյան - 85 կգ ք/կ (նոյեմբերի 26)