1949-ից մինչև 2014-ը. «Էմմի»-ի հաղթողները, ռեկորդակիրներն ու պատմությունը

PanARMENIAN.Net - Ռեժիսուրայի համար էմմի է ստացել Քերի Ֆուքունագան, որը նկարահանել է True Detective սերիալը: Դրամատիկական սերիալի լավագույն դերասանուհի է ճանաչվել Ջուլիանա Մարգուլիսը The Good Wife սերիալում դերի համար:

Արդեն անցած սեզոնի լավագույն կատակերգական սերիալ արդեն 5-րդ տարին շարունակ ճանաչվել է Modern Family-ն: Ջիմ Փարսոնսը լավագույն կատակերգուի մրցանակի է արժանացել The Big Bang Theory-ում դերի համար, այդ ժանրում դերասանուհի՝ Ջուլիա Լուի Դրեյֆուսը՝ Veep-ի համար:

Լուի Սի Քեյը մրցանակի է արժանացել կատակերգական Louie սերիալի լավագույն սցենարը գրելու համար: Ինչպես գրում է ԻՏԱՐ-ՏԱՍՍ-ը, որպես լավագույն ռեալիթի շոու են ընտրել Amazing Race-ը, որի համար սա արդեն 10-րդ մրցանակաբաշխությունն է:

Սթիվեն Մոֆաթը ստացել է «Մինի-սերիալի, ֆիլմի կամ դրամատիկական ծրագրի լավագույն սցենար» մրցանակը Sherlock. His Last Vow սերիայի համար: Շերլոկ Հոլմսի դերակատար Բենեդիկտ Քամբերբեչն արժանացել է մինի-սերիալի լավագույն դերասանի կոչմանը:

«Էմմի»-ն ամերիկյան մրցանակաբաշխություն է, որն «Օսկար»-ի, «Գրեմմի»-ի ու «Թոնի»-ի հեռուստատեսային համարժեք տարբերակն է:

Դրա շրջանակում մի քանի մրցանակաբաշխություն է անցկացվում, բայց հեռուստադիտողների հիմնական մասը տեղյակ է միայն դրանցից մեկի՝ այսպես կոչված մրցանակաբաշխության պրայմ-թայմի մասին, որն անցնում է սեպտեմբերին: Առաջին «Էմմի»-ն 1949-ի հունվարի 25-ին էր՝ Հոլիվուդյան սպորտային ակումբում, որում, սակայն, ներառված էին միայն Լոս Անջելեսի ծրագրերը:

Ի սկզբանե գոյություն ուներ միայն մեկ «Էմմի», որն ամեն տարի հանձնում էին հեռուստատեսային նոր շրջանի մեկնարկից առաջ: 1950-ին «Էմմի»-ն ազգային կարգավիճակ ստացավ ու ընդգրկում էր նախագծերն ամբողջ երկրով մեկ, բայց ամեն ինչ փոխվեց, երբ 1974-ին հիմնվեց «Ցերեկային Էմմի մրցանակաբաշխությունը», որը մրցանակ էր շնորհում ցերեկվա ժամերին թողարկվող լավագույն ծրագրերին: Դրանից հետո «Էմմի» սկսեցին կոչել մրցանակների տարբեր շարքերը, իսկ հենց լավագույն պրայմ-թայմ սերիալների ու դրանց հերոսների մրցանակաբաշխությունը անվանակոչվեց «Պրայմ-թայմ Էմմի մրցանակաբաշխություն»: Բացի այդ, 70-ականների սկզբում հիմնվեց «Էմմիի միջազգային մրցանակաբաշխությունը», որի նպատակն էր խրախուսել ակադեմիկոսների կարծիքով լավագույն հեռուստահաղորդումները:

Այսօր «Էմմի» մրցանակներն իրենցից ներկայացնում են ամերիկյան հեռուստատեսային արդյունաբերության տարբեր սեկտորներն ու մրցանակաբաշխություններն անցկացվում են ամեն տարի, բայց տարբեր ամիսներին՝ ըստ ոլորտի:

Մրցանակաբաշխությունը երեք կազմակերպություն է ներկայացնում՝ Ամերիկյան հեռուստատեսային ակադեմիան մրցանակներ է հանձնում երեկոյան ծրագրերին, բացի մարզականներից, Ամերիկյան ազգային հեռուստատեսային ակադեմիան՝ ցերեկային, մարզական, լրատվական ու դոկումենտալ ծրագրերին, իսկ Միջազգային հեռուստատեսային ակադեմիան՝ հաղորդումներին, որոնք արտադրվել ու հեռարձակվում են ԱՄՆ տարածքից դուրս:

«Էմմի» մրցանակը հանձնում են 463 անվանակարգում:

«Էմմի» անվանումն immy բառից է՝ այդպես էր կոչվում առաջին հեռուստատեսային տեսախցիկների միջի կատոդային խողովակը: Արձանիկի վրայի կնոջ ձեռքի ատոմը հեռուստատեսությունը որպես գիտություն է խորհրդանշում, իսկ նրա հետևի թևերը՝ որպես արվեստ:Հայտնի արձանիկի հեղինակը հեռուստատեսային ինժեներ Լուի Մաքմանուսն էր, որը որպես մոդել ընտրել էր իր կնոջը:

Հեռուստատեսային ակադեմիան ընդհանուր առմամբ 47 առաջարկ է մերժել՝ մինչև 1948-ին Մաքմանուսի դիզայնի վրա կանգ առնելը: Հենց այդ արձանիկը, որը արվեստի մուսան խորհրդանշող թևերով հրեշտակ էր հիշեցնում, հեղինակի մտահղացմամբ ապացուցում էր, որ հեռուստատեսությունն արվեստի, գիտության ու տեխնոլոգիաների սինթեզ է:

Յուրաքանչյուր արձանիկ 3,08 կգ է կշռում, բարձրությունը 39 սմ է, իսկ պատրաստված է պղնձի, նիկելի, արծաթի ու ոսկու խառնուրդից: «Էմմի» տարածաշրջանային մրցանակները 29 սմ են: Արձանիկները ձուլում են Նյու Յուրքում, նույն ընկերությունում, որը պատրաստում է օսկարներն ու ոսկե գլոբուսները:

Մրցանակաբաշխության սեփականատերերը, որոնք, հետևաբար, նաև ապրանքանիշի տերերն են, խիստ պահանջներ ունեն արձանիկների պատկերման հարցում՝ դրանք կարելի է պատկերել միայն ձախ կողմից:

Մրցանակաբաշխության գոյության ընթացքում էմմի արձանիկների արժանացած ռեկորդակիրներն են.

CBS հեռուստաընկերությունը՝ տարեկան առավելագույն հաղթանակների քանակով (1974-ին այն 44 արձանիկ ստացավ):

Saturday Night Live՝ ավելի շատ արձանիկ է ստացել (40 հատ), քան մյուս շաբաթօրյա ծրագրերը:

The Simpsons մուլտսերիալը «Լավագույն անիմացիոն ծրագիր» անվանակարգում 27 արձանիկի է արժանացել:

Շեյլա Նևիսը՝ HBO հեռուստաալիքի դոկումենտակ ու ընտանեկան ծրագրերի տնօրերը, 21 անձնական հաղթանակ ունի:

Կլորիս Լիչմենը՝ Մել Բրուքսի հայտնի պարոդիաների աստղը, «Լավագույն դերասանական աշխատանք» անվանակարգում 8 հաղթանակ ունի:

John Adams (2008)՝ կենսագրական սերիալը, որը, պատմելով ԱՄՆ հիմնադիրներից մեկի ճակատագրի մասին, «Լավագույն մինի-սերիալ» անվանակարգում 13 էմմիի է արժանացել:

«Դրամա» անվանակարգում առավելագույն հաղթանակների հասած սերիալները.

Hill Street Blues՝ 4 էմմի,

L.A. Law՝ 4 էմմի,

The West Wing՝ 4 էմմի: