Հայաստանի հունահռոմեական ըմբշամարտի հավաքականը Աշխարհի գավաթի մրցաշարում նվաճել է բրոնզե մեդալներ

PanARMENIAN.Net - Իսկ եզրափակչում հանդիպեցին Իրանի եւ Թուրքիայի հավաքականները: Այդ պայքարում հաղթեց Իրանի հավաքականը 4:3 հաշվով: Աշխարհի գավաթում առաջին երեք տեղերը զբաղեցրած հաղթողները բացի գավաթներից ստացան դրամական մրցանակներ` 50 հազար, 30 հազար եւ 20 հազար դոլար: Գավաթին մասնակցել էին 8 երկրների հավաքականներ` Հայաստան, Իրան, Հունգարիա, Սկանդինավիայի հավաքականը, Կուբա, Ռուսաստան, Թուրքիա, Վրաստան: Հայաստանի ազատ ոճի ըմբշամարտիկները փետրվարի 18-19-ը Իրանի Իսպահան քաղաքում մասնակցեցին «Թախտիի գավաթ» միջազգային մրցաշարին: Պատվիրակության կազմում, որը գլխավորում է Արայիկ Բաղդադյանը, 13 ըմբշամարտիկ էր ընդգրկված:

Ձմեռային Օլիմպիական խաղեր. Փետրվարի 15-ին Վանկուվերում ընթացող Ձմեռային օլիմպիական խաղերում 15 կմ դահուկավազքում հայ դահուկորդ Սերգեյ Միքայելյանը գրավել է 70-րդ տեղը 95 մասնակիցների թվում: Այդ տարածությունը նա հաղթահարել է 37.58,9 րոպեում: Օլիմպիական չեմպիոն է դարձել շվեյցարացի Դարիո Կոլոնյան (33.36,3 րոպե):

Կանանց 10 կմ դահուկավազքում հայաստանցի Քրիստինե Խաչատրյանը, ցույց տալով 34.17,5 րոպե արդյունքը, զբաղեցրեց 76-րդ տեղը 78 դահուկորդների թվում: Չեմպիոն դարձավ շվեդուհի Շարլոտտա Կալլան (24.58,4 րոպե):

Ֆուտբոլ. Մարտի 3-ին Հայաստանի ֆուտբոլի հավաքականը կանցկացնի ընկերական խաղ Բելառուսի հավաքականի հետ Թուրքիայում: Բելառուսի գլխավոր մարզիչ Բերնդ Շտանգեն արդեն հրապարակել է իր հավաքականի կազմը: Հայաստանի եւ Բելառուսի հավաքականները հանդիպել են երեք անգամ: Մեկական անգամ հաղթեց հավաքականներից յուրաքանչուրը, իսկ մեկ անգամ խմբերը ոչ ոքի խաղացին:

Մինչեւ Հայաստանի առաջնության մեկնարկը հայկական ակումբները շարունակում են պատրաստությունները եւ ընկերական խաղերը:

«Բանանց» ՖԱ-ը Անթալիայում անցկացնում է մարզաուսումնական հավաք: Ակումբը այս շաբաթվա ընթացքում անցկացրել է երկու խաղ: Առաջին խաղում ռումինական «Արջեշ» ակումբի դեմ «Բանանցը» պարտվեց 1:2 հաշվով, իսկ «Անջիի» (Մախաչկալա) հետ խաղաց 2:2 հաշվով:

Իսկ արծաթե մրցանակակիր «Միկան» Կիպրոսում հանդիպել է Կիեւի «Դինամո 2» ակումբի հետ, եւ պարտվեց 3:0 հաշվով:

Փետրվարի 14-ին Դոնեցկի «Մետալուրգ» ֆուտբոլի ակումբը, որտեղ հանդես են գալիս Հայաստանի հավաքականի ֆուտբոլիստներ Հենրիկ Մխիթարյանն ու Արտակ Դաշյանը, ընկերական խաղ է անցկացրել իսպանական «Մարբելիայի» հետ, որը հանդես է գալիս Segunda Division B երկրորդ իսպանական լիգայում: «Մետալուրգ» ֆուտբոլի ակումբը 4:0 հաշվով հաղթել է «Մարբելիային»` երրորդ գոլը 38-րդ րոպեին խփել է Հենրիկ Մխիթարյանը: Իսկ փետրվարի 17-ին «Մետալուրգը» անցկացրեց եզրափակիչ ընկերական խաղ շվեդական «Մալմեի» դեմ: Խաղը ավարտվեց 0:0 հաշվով:

Թուրքիայում ընկերական խաղ անցկացրեցին ռումինական «Ստյաուան», որտեղ հանդես են գալիս Հայաստանի հավաքականի ֆուտբոլիստներ Արման եւ Արտավազդ Քարամյանները, եւ բելառուսական «ԲԱՏԷ» ակումբը, որի կազմում խաղում է Հայաստանի հավաքականի հարձակվող Հովհաննես Գոհարյանը: 2:0 հաշվով հաղթանակ տարավ ռումինական ակումբը:

Բռնցքամարտ. Հայ բռնցքամարտիկ Արթուր Աբրահամը եւ գերմանացի Մարկո Հուքը շարունակում են պատրաստվել իրենց հաջորդ մենամարտերին: Մարտի 6-ին Աբրահամը «Super Six World Boxing Classic» մրցաշարի շրջանակներում Կալիֆոռնիայում կանցկացնի իր երկրորդ մենամարտը Անդրե Դիրրելի դեմ (ԱՄՆ): Աբրահամն արդեն դիտել է մի քանի մենամարտ Դիրրելի մասնակցությամբ, այդ թվում նրա վերջին մենամարտը բրիտանացի Կառլ Ֆրոչի դեմ: «Դիրելն անհարմար մրցակից է, սակայն ես անպայման ցանկանում եմ ռինգը թողնել որպես հաղթող»,-ասել է Աբրահամը:

Մեկ այլ պրոֆեսիոնալ բռնցքամարտիկ` թեթեւագույն քաշային կարգում WBC եւ WBA վարկածներով աշխարհի չեմպիոն Վիկ Դարչինյանն հայտարարել է, որ ցանկանում է անցկացնել խաղ-ռեւանշ Նոնիտո Դոնեյրի (Ֆիլիպիններ) հետ:

«Նա գիտի, որ այդ դեպքում նրա բախտը կբերի եւ այժմ նա անում է ամեն ինչ ինձ հետ հանդիպումից խուսափելու համար: Այժմ նա ցանկանում է մենամարտել Արսեի հետ, որը վերջերս պայքարում էր թափուր տիտղոսի համար,-ասել է Դարչինյանը:-Ես երկու տիտղոս ունեմ: Եթե նա իրեն իսկական տղամարդ է համարում, ապա պետք է միավորված մենամարտ անցկացնի ինձ հետ: Նա կարող է կռվել Արսեի հետ` իմ հետ մենամարտից հետո»:

Շախմատ. Փետրվարի 17-ին Մոսկվայում ավարտվեց Aeroflot Open շախմատային մրցաշարը: Փետրվարի 17-ին Մոսկվայում ավարտվեց «Աերոֆլոտ օփեն» շախմատի մրցաշարը: A1 մրցաշարում բոլոր 4 հայ շախմատիստներն էլ ոչ ոքի են խաղացել: Գաբրիել Սարգսյանը 5,5 միավորով զբաղեցրել է 12-րդ տեղը, Հրանտ Մելքումյանն ու Արման Փաշիկյանը 5 միավորներով զբաղեցնում են 31 եւ 32-րդ տեղը: Զավեն Անդրիասյանը 4 միավորով 62-րդ տեղում է: Մրցաշարի հաղթող է դարձել վիետնամցի գրոսմայստեր Լիմ Լի Կուանգը 7 միավորով:

A2 մրցաշարում Տիգրան Քոթանջյանը 5 միավոր է հավաքել եւ ավարտել է իր ելույթները «Աերոֆլոտ օփեն»-ում 25-րդ տեղում: Իսկ Դավիթ Պետրոսյանը 4 միավորով 44-րդ տեղում է: A2 մրցաշարում հաղթել է ռուսաստանցի Ալեքսեյ Պրիդորոժնին 6,5 միավորով:

Փետրվարի 16-ին տեղի ունեցավ շախմատի Լինարեսի մրցաշարի 4-րդ տուրը, որին մասնակցում է հայ գրոսմայստեր Լեւոն Արոնյանը: 4-րդ տուրից հետո Արոնյանը 2 միավորով 3-րդ տեղում է:

Հունիսի 3-7-ը Լեւոն Արոնյանը կմասնակցի Լեոնում (Իսպանիա) կայանալիք արագ շախմատի առաջնությանը: Արոնյանի մրցակիցները կլինեն Բորիս Գելֆանդը (Իսրայել), Ֆրանսիսկո Վալյեխո Պոնսը (Իսպանիա) եւ Լենյեր Դոմինգես Պերեսը (Կուբա):

Թենիս. Դավիթ Նալբանդյանը վնասվածքից հետո վերադարձավ մեծ թենիս: Փետրվարի 17-ին Բուենոս Այրեսում տեղի ունեցած Copa Telmex-2010-ում որոշիչ սեթի ժամանակ կարողացավ հաղթահարել իսպանացի Դանիել Հիմենո-Տրավերի դիմադրությունը 6:7, 6:4, 7:6 հաշվով: Եզրափակիչ դուրս գալու համար նա կմրցի Իսպանացի Ալբերտ Մոնտանյեսի հետ:

Սուսերամարտ. Փետրվարի 17-ին Հայաստանի սուսերամարտի ֆեդերացիայի գլխավոր քարտուղար Արտաշես Մադոյանը հաղորդել է, որ Հայաստանի կադետների եւ պատանիների սուսերամարտի հավաքականը չի մասնակցի Բաքվում կայանալիք աշխարհի առաջնությանը, որը տեղի կունենա ապրիլի 2-10-ը: «Մեր ֆեդերացիան որոշել է, որ մենք չենք մասնակցի եւ այդպես ավելի լավ կլինի մեր մարզիկների համար»,-ասել է Մադոյանը: