Միշել Պլատինի. UEFA-ն բազմաթիվ նման համալիրներ է կառուցել Եվրոպայում, սակայն Երևանի ակադեմիան առանձնահատուկ է

Օգոստոսի 26-ից սեպտեմբերի 2-ը տեղի ունեցած գլխավոր սպորտային իրադարձությունների տեսություն

Ֆուտբոլ. Սեպտեմբերի 1-ին ՀՀ նախագահ Սերժ Սարգսյանի և UEFA նախագահ Միշել Պլատինիի մասնակցությամբ Երևանում կայացել է Ֆուտբոլային ակադեմիայի բացման արարողությունը: Իր խոսքում Պլատինին ասաց, որ դեռ 2007-ին FIFA նախագահ Զեպ Բլատերի հետ դրել են ակադեմիայի հիմքերը: «Այդ ժամանակ մենք «փոխանցում» կատարեցինք և այսօր տեսանք «գոլը»,- նշեց Պլատինին և հավելեց, որ դա քայլ է Հայաստանում ֆուտբոլի զարգացման մեջ:

PanARMENIAN.Net - ՀՀ նախագահ Սերժ Սարգսյանը Պլատինիին պատվո շքանշան հանձնեց ֆուտբոլի զարգացման մեջ ունեցած ավանդի համար: ՀՖՖ նախագահ Ռուբեն Հայրապետյանն ասաց, որ Ֆուտբոլային ակադեմիայի կառուցման համար ծախսվել է 12 մլն դոլար, որոնցից 7 մլն 475 հազար դոլարը տրամադրել է UEFA-ն, 400 հազար դոլարը` FIFA-ն, իսկ մնացած մասը` ՀՖՖ-ն:

Երևանում Ֆուտբոլի ակադեմիայի բացումից հետո, UEFA-ի նախագահ Միշել Պլատինին և ՀՖՖ նախագահ Ռուբեն Հայրապետյանը համատեղ մամլո ասուլիս տվեցին: Հայրապետյանը շնորհակալություն հայտնեց Պլատինիին և UEFA-ին հայկական ֆուտբոլին ցուցաբերած աջակցության համար:

«Գումարի 62 տոկոսը տրամադրեց UEFA-ն և այսօր մենք ունենք եվրոպական մակարդակի մարզահամալիր: Ակադեմիայում կկառուցվի 3000 հանդիսատեսի համար նախատեսված մարզադաշտ»,-ասել է Հայրապետյանը:

Պլատինին նշել է, որ UEFA-ն միշտ աջակցելու է ազգային ֆեդերացիաներին: Իսկ հայկական ֆուտբոլի մասին նա ասաց. «Ես տեսա ՀՀ հավաքականի 2 խաղ. մեկը Թուրքիայի հետ և մինչև 19 տարեկանների ՀՀ հավաքականի խաղը Սլովենիայի հավաքականի հետ: Կարծում եմ, որ նրանք վատ չխաղացին»:

«UEFA-ն բազմաթիվ նման համալիրներ է կառուցել Եվրոպայում, սակայն այս համալիրն առանձնահատուկ է և շատ գեղեցիկ»,-ասել է UEFA-ի նախագահը:

Օգոստոսի 30-ին Հայաստանի ֆուտբոլի ազգային հավաքականը սկսել է մարզումները, նախապատրաստվելով Իռլանդիայի հավաքականի դեմ մրցախաղին, որը տեղի է ունենալու ֆուտբոլի նորակառույց ակադեմիայում: EURO-2012 ընտրանու մրցաշարի շրջանակներում հավաքականներն առաջին խաղը կանցկացնեն Երևանում, սեպտեմբերի 3-ին:

PanARMENIAN.Net ի թղթակցի հետ զրույցի ընթացքում հավաքականի գլխավոր մարզիչ Վարդան Մինասյանը հաղորդել է, որ առաջին մարզումը բաց է թողել միայն Հենրիկ Մխիթարյանը, ով օգոստոսի 30-ի երեկոյան է միացել հավաքականին: «Թիմի մյուս խաղացողները մարզվել են և լավ մարզավիճակում են: Սակայն մենք ձախ թևի պաշտպանությունում բարդություն ունենք` Աղվան Մկրտչյանը վնասվածք է ստացել, իսկ Լևոն Հայրապետյանն այս պահին ոչ մի ակումբում գրանցված չէ: Վնասվածք է ստացել նաև ձախ կիսապաշտպան Գևորգ Ղազարյանը, որը Իռլանդիայի դեմ մրցախաղին չի մասնակցելու: Կասկածելի է նաև Մակեդոնիայում տեղի ունեցող մրցաշարին նրա մասնակցությունը», - ասել է Մինասյանը:

Վնասվածքներ ունեցող ֆուտբոլիստների փոխարեն կարող են խաղալ Արտակ Եդիգարյանը և Հովհաննես Համբարձումյանը: Եդիգարյանը հանդես է եկել Ուզբեկստանի հավաքականի դեմ ընկերական խաղում և ըստ հավաքականի մարզիչի, վատ չի խաղացել: Իռլանդիայի հավաքականի վնասվածք ստացած մի քանի ֆուտբոլիստների մասին Մինասյանն ասել է, որ նրանք խաղացողների մեծ ընտրություն ունեն և կարծիք հայտնեց, որ Իռլանդիայի խաղի մարտավարությունում փոփոխություն չի լինի: Մարզիչը գտնում է, որ Իրանի և Ուզբեկստանի հավաքականների հետ ընկերական խաղերում հայ ֆուտբոլիստները վատ չեն խաղացել, սակայն հիմա ամեն ինչ ավելի բարդ է, քանի որ սկսվում են պաշտոնական մրցախաղերը:

Սեպտեմբերի 2-ին Իռլանդիայի հավաքականի իտալացի մարզիչ Ջովանի Տրապատոնին և թիմի ավագ Ռոբի Կինը հանդիպեցին լրագրողների հետ: Հայաստան-Իռլանդիա խաղի մասին, որը կկայանա սեպտեմբերի 3-ին Վազգեն Սարգսյանի անվան հանրապետական մարզադաշտում, Տրապատոնին ասաց հետևյալը. «Դա խմբում առաջին խաղն է, և ուստի հեշտ չի լինի հոգեբանական առումով, և հետո առաջին արդյունքը շատ կարևոր է: Հայաստանի հավաքականը շատ արագ է խաղում և տեխնիկապես լավ է պատրաստված»:

Նա խոստովանեց, որ առաջին անգամ իմ մարզչական կարիերայի ընթացքում նա կանվանի ֆավորիտին` դա Իռլանդիայի հավաքականն է: «Ես միշտ ուսումնասիրում եմ հակառակորդի թույլ և ուժեղ կողմերը և փորձում եմ կիրառել դրանք »,- ասաց Տրապատոնին:

Հայաստանի ֆուտբոլի բարձրագույն լիգայի 19-րդ փուլում չորս խաղ է կայացել: Կենտրոնական խաղում «Բանանցը» ընդունեց «Փյունիկին»: Առաջին խաղակեսից հետո «Փյունիկի» ֆուտբոլիստները առաջ էին անցել հաշվում, գոլեր խփեցին Կարլեն Մկրտչյանն ու Էդգար Մանուչարյանը: Սակայն երկրորդ խաղակեսում Դենիրա Օրտեգան կարողացավ երկու գնդակ խփել և խաղն ավարտվեց 2:2 հաշվով: Հաղթանակի դեպքում «Փյունիկը» կկարողանար կրճատել միավորների տարբերությունը` հասցնելով այն երկուսի, սակայն առաջնության առաջատար «Բանանցն» կատարեց իր առջև դրված խնդիրն ու գլխավորում է աղյուսակը 45 միավորով: «Փյունիկը» երկրորդ տեղում է 40 միավորով:

«Ուլիսը» չկարողացավ զբաղեցնել երկրորդ տեղը, ոչ ոքի խաղալով «Կիլիկայի» հետ, խաղն ավարտվեց 0:0 հաշվով: Հայաստանի 2009-ի բրոնզե մրցանակակիրը 39 միավորով 3-րդ տեղում է:

«Միկան» նվազագույն հաշվով հաղթեց «Գանձասարին» Էդնեյ դե Օլիվեյրայի գոլի շնորհիվ: Իսկ «Իմպուլսն» ու «Շիրակը» 2-ական գոլ խփեցին մրցակցի դարպասներին, խաղն ավարտվեց 2:2 հաշվով:

Հայաստանի հավաքականի ֆուտբոլիստ Հենրիկ Մխիթարյանը, որը հանդես է գալիս Դոնեցկի «Մետալուրգում», հնգամյա պայմանագիր է ստորագրել Դոնեցկի մեկ այլ ակումբի` Ուկրաինայի գործող չեմպիոն «Շախտյորի» հետ:

21-ամյա ֆուտբոլիստի համար «Շախտյորը» վճարել է 7,5 մլն դոլար: Պաշտոնապես տրանսֆերի մասին կհայտարարվի օգոստոսի 30-ին:

ՖԻԴԵ-ն հրապարակել է 100 ուժեղագույն շախմատիստների վարկանիշային ցուցակը

Հայ գրոսմայստեր Լևոն Արոնյանը 5-րդ տեղից բարձրացել է 4-րդ տեղը (2783 միավոր):

Ցուցակի առաջատարը Մագնուս Կարլսենն է (Նորվեգիա) 2826 միավորով: 2-րդ տեղը 2691 միավորով զբաղեցնում է Վեսելին Տոպալովը (Բուլղարիա), իսկ ահա Գաբրիել Սարգսյանը 62-րդն է (2677 միավոր):

Կանանց վարկանիշային աղյուսակում Լիլիթ Մկրտչյանը 21-րդն է (2484 միավոր), Էլինա Դանիելյանը` 31-րդը (2466 միավոր): Առաջատարը Յուդիթ Պոլգարն է (Հունգարիա), որն ունի 2682 միավոր:

Հունաստանի Սալոնիկ քաղաքում ավարտվեց Կալամարիա-օփեն միջազգային մրցաշարը: Հայ գրոսմայստեր Զավեն Անդրիասյանը վերջին 9-րդ տուրում միավորները կիսեց Ջուլիան Ռադուլսկու հետ Բուլղարիայից: Չնայած դրան, Անդրիասյանը 9 հնարավորից հավաքեց 7 միավոր և դարձավ Կալամարիայի բաց մրցաշարի հաղթողը: Նա 0,5 միավորով առաջ անցավ 5 շախմատիստներից:

Նույն տուրում Վահե Բաղդասարյանը զիջեց Իոանիս Նիկոլաիդիսին Հունաստանից և 5,5 միավորով ավարտեց ելույթը 17-րդ տեղում: Աղասի Ինանցը 55-րդն է 3 միավորով:

Ձյուդո Ձյուդոյի միջազգային ֆեդերացիայի հանձնարարությամբ արդեն 1,5 տարի է, ինչ Հայաստանում է գտնվում սենսեյ Կիրիլա Ալեքսանդրոն Ռումինիայից: Այցի նպատակն է ծանոթացնել տեղի մարզիկներն այն փոփոխությունների հետ, որ կատարվել են ձյուդոյում: Մեր նախագահը սիրում է ձյուդոյի մեծ ավանդույթներ ունեցող փոքր երկրները, որոնք լավ արդյունքներ են ցույց տալիս, և Հայաստանը այդ երկրներից մեկն է, ասել է Ալեքսանդրոն:

Ալեքսանդրոն եղել է Հայաստանի և ԼՂՀ ձյուդոյի դպրոցներում և ծանոթացել է հայ մարզիչների մեթոդների հետ: 2010թ. Հայաստանի ձյուդոյի հավաքականները մասնակցել են տարբեր միջազգային մրցաշարերին: Հայաստանի ձյուդոյի ֆեդերացիայի նախագահ Ալեքսան Ավետիսյանը գտնում է, որ մարզիկները վատ չեն ելույթ ունեցել և տարեվերջին կկատարեն իրենց առջև դրված խնդիրը: «Մարտին Արմեն Նազարյանը դարձավ Խաղաղության գավաթի հաղթողը, Գրիգոր Իվանյանը, Գոռ Հարությունյանը և Արթուր Կրոյանը տարբեր մեդալներ նվաճեցինԵվրոպայի երիտասարդական առաջնությանը: Իսկ օրերս Օլիմպիական խաղերում բրոնզե մեդալակիր դարձավ Դավիթ Ղազարյանը»,-ասել է Ավետիսյանը:

Հայաստանի հավաքականը պատրաստվում է աշխարհի առաջնությանը, որը կանցնի Տոկիոյում սեպտեմեբրի 9-13, իսկ սեպտեմբերի 15-ին Սոֆիայում կմեկնարկի Եվրոպայի երիտասարդական առաջնությունը: Վերջին միջազգային մրցաշարը հայ ձյուդոիստները կանցկացնեն Մարոկկոյում, որտեղ կանցնի աշխարհի երիտասարդական առաջնությունը:

«Մեր ֆեդերացիան իրավունք է ստացել 2012թ. հունիսի վերջում Երևանում անցկացնել Եվրոպայի պատանեկան առաջնությունը, մինչ այդ մայիսին մենք կանցկացնենք մարզչական ու մրցավարական սեմինար, որին կմասնակցեն ձյուդոյի առաջատար մասնագետներ: Դա մեզ համար կարևոր իրադարձություն է, հատկապես այն բանից հետո, երբ մենք կազմակերպեցինք Եվրոպայի երիտասարդական առաջնությունը, որը միջազգային ֆեդերացիան ճանաչեց տարվա լավագույն մրցաշար»,-ասել է Ավետիսյանը:

Հանդբոլ. Սեպտեմբերի 2-ին Վանաձորում մեկնարկեց հանդբոլի «Հայաստանի վարչապետի գավաթ» միջազգային մրցաշարը: « Մենք շատ ուրախ ենք, որ Վանաձորում տեղի է ունենում այդպիսի խոշոր մրցաշար, դա մեզ համար մեծ պատիվ է և ցանկանում ենք, որպեսզի այդ 3 օրերը տոն դառնան հանդբոլի սիրահարների համար»,- բացման արարողության ժամանակ ասաց Լոռու մարզպետ Արամ Քոչարյանը:

Հայաստանի Հանդբոլի ֆեդերացիայի նախագահ Սարգիս Գևորգյանը կարծում է, որ Վարչապետի գավաթը կօգնի Հայաստանում հանդբոլի տարածմանը և զարգացմանը:

Մրցաշարին մասնակցում են մարզիկներ Հայաստանից, Իրանից, Վրաստանից և Բելառուսից: «Վարչապետի գավաթը» կավարտվի սեպտեմբերի 4-ին: Դրան զուգահեռ ընթանում է մինչև 16 տարեկան պատանիների և աղջիկների Հայաստանի առաջնության երկրորդ փուլը:

ԲռնցքամարտԵրկրորդ միջին քաշային կարգում նախկին չեմպիոն, բրիտանացի Կարլ Ֆրոչը BBC-ի հետ հարցազրույցում հաստատել է այն տեղեկատվությունը, որ նրա մենամարտը Արթուր Աբրահամի հետ, որը կկայանա հոկտեմբերի 2-ին, կդառնա «Super Six» մրցաշարի կիսաեզրափակիչը: Այդ մարտը նաև կորոշի, թե բռնցքամարտիկներից ով կդառնա WBC վարկածով տիտղոսակիր, որից հրաժարվել էր մցաշարի նախկին մասնակից Միքել Քեսլերը (Դանիա): Մեկ այլ կիսաեզրափակիչ մենամարտում կհանդիպեն WBA վարկածով չեմպիոն ամերիկացի Անդրե Ուորդը և նրա հայրենակից Անդրե Դիրելը: «Աբրահամի դեմ մարտը կլինի WBC տիտղոսի համար»,- ասել է Ֆրոչը,- և կդառնա մրցաշարի կիսաեզրափակիչը: Ինձ համար դա լավ նորություն է: Մնացել ենք ես ու Աբրահամը, և մենք պետք է հանդիպենք ռինգում: Ուորդի և Դիրելի մենամարտը երկրորդ կիսաեզրափակիչ մարտն է: Այնպես որ եզրափակիչ մենամարտը կլինի WBC և WBA տիտղոսների համար պայքարը: Ես պետք է կատարեմ Աբրահամի դեմ պայքարում իմ առաջադրանքը»:

Ֆրոչի խոսքերով, Քեսլերը, որը հրաժարվել էր մասնակցել մրցաշարին վնասվածքի պատճառով, WBC վարկածով չեմպիոնի հետ մենամարտելու իրավունք կստանա մրցաշարի ավարտից հետո: «Եզրափակիչ մարտից հետո Քեսլերը մարտ կանցկացնի WBC տիտղոսի համար: Նա կդառնա WBC վարկածով պատվավոր չեմպիոն, ինչը նշանակում է, որ ես ու Աբրահամը կպայքարենք իմ հին տիտղոսի համար: Ես կրկին շանս ունեմ դառնալ աշխարհի չեմպին, եթե ամեն ինչ ճիշտ անեմ, Քեսլերն իրավունք կունենա մենամարտել տիտղոսի համար, քանի որ հոժարակամ հրաժարվել էր դրանից»,- ասել է Ֆրոչը, հաղորդում է allboxing.ru-ն:

Թենիս. Արգենտինահայ թենիսիստ Դավիթ Նալբանդյանը դժվարությամբ դուրս եկավ US Open 2010-ի երկրորդ շրջան: Օգոստոսի 31-ին աշխարհի 33-րդ ռակետը միայն 5 սեթերում առաջ անցավ աշխարհի 231-րդ ռակետ Ռիկ դե Վոեստայից (ՀԱՀ): Նալբանդյանը հաղթեց 7:6, 3:6, 6:4, 6:7 և 6:4 հաշվով, հաղորդում է gotennis.ru-ն:

Այդ հաղթանակի շնորհիվ Նալբանդյանը մեծացրեց իր առավելությունը Ռիկի հետ անձնական հանդիպումների հաշիվներում` 2:0:

Մրցաշարի 3-րդ շրջան դուրս գալու համար նա կմրցի ֆրանսիացի Ֆլորան Սերայի հետ:

Ավելի վաղ Նալբանդյանը և Սերան երբեք չեն հանդիպել պաշտոնական մրցումներում:

Գոհար Նալբանդյան, Հասմիկ Բաբայան / PanARMENIAN News
 Ամենաընթերցվողը բաժնում
Մասնագետը՝ առողջ ապրելակերպի մասին
Ինչու են կանայք ընտրում ֆիթնես և բոդիբիլդինգ
Լավագույն app-երը՝ առավել զգուշավորների այլընտրանք
Ինչպես են մարզասրահները և մարզվողները «ֆորմի մեջ» մնում
 Ուշադրության կենտրոնում
Մարմնամարզիկ Արթուր Դավթյանը Աշխարհի գավաթի եզրափակչում է

Մարմնամարզիկ Արթուր Դավթյանը Աշխարհի գավաթի եզրափակչում է Ավելի վաղ եզրափակիչ էին դուրս եկել Արթուր Ավետիսյանն ու Վահագն Դավթյանը

 Բաժնի այլ նյութերը
Easy ֆուտբոլ՝ մեծ էկրանին Դարձիր «12-րդ խաղացող» Անգլիական այգում, երկրպագիր մերոնց մաքուր օդին
Ուղին անվանում է առաջնամագլցողը Հարմարավետության գոտուց դուրս, քաղաքային աղմուկից հեռու
Բրազիլական ջիու-ջիցուն Հայաստանում Գետնի վրա մենամարտել իմացողն առավելություն ունի
---