Էդվարդ Նալբանդյան. Հայաստանը շահագրգռված է Իտալիայի հետ բազմաբնույթ կապերի ընդլայնմամբ

PanARMENIAN.Net - Ապրիլի 23-ին ՀՀ ԱԳ նախարար Էդվարդ Նալբանդյանն ընդունեց Միլանի նահանգապետ Գվիդո Պոդեստային, ով Երևանում է գտնվում «Երևանը 2012թ. գրքի համաշխարհային մայրաքաղաք» միջոցառումների շրջանակում:

Ողջունելով հյուրին՝ նախարար Նալբանդյանը նշեց, որ հայ-իտալական բարեկամական առնչությունները դարերի պատմություն ունեն և լավ հիմք են ապահովում արդյունավետ և բազմաոլորտ համագործակցություն ծավալելու համար։ Դրա լավագույն վկայությունն են անցյալ տարվա դեկտեմբերին ՀՀ նախագահի այցը Իտալիա և այցելության ընթացքում բարձր ձեռք բերված պայմանավորվածություները:

«Հայաստանը շահագրգռված է Իտալիայի հետ բազմաբնույթ կապերի ընդլայնմամբ և խորացմամբ, մեր երկու երկրների միջև հաստատվել է ակտիվ քաղաքական երկխոսություն, զարգանում են միջխորհրդարանական կապերը, համագործակցությունը առևտրատնտեսական, կրթա-մշակութային և այլ ոլորտներում: Այդ շարքում իր կարևոր տեղն ունի ապակենտրոնացված համագործակցությունը, գոհունակությամբ կարող ենք նշել, որ Հայաստանի և Իտալիայի քաղաքների ու շրջանների միջև հաստատվել են բարեկամական կապեր, իրականավում են փոխայցելություններ, կենսագործվում են համատեղ ծրագրեր, ինչն ավելի է ակտիվացել հատկապես վերջին տարիներին»,- ընդգծել է Նալբանդյանը:

Զրուցակիցներն անդրադարձան Իտալիայի Միլան նահանգի և Հայաստանի Կոտայքի մարզի միջև համագործակցությանը և դրա ընդլայնման հնարավորություններին:

Կողմերը քննարկեցին տնտեսական փոխգործակցության ընդլայնմանն ուղղված քայլերը՝ ընդգծելով Միլան նահանգի տնտեսական ներուժը: Երկուստեք հատուկ նշեց հայ համայնքի դրական ներդրումը նահանգի հայ-իտալական հարաբերություններում: