Ադրբեջանցիներն ուզում են յուրացնե՞լ թալիշների մշակութային ժառանգությունը

PanARMENIAN.Net - Ադրբեջանի հարավում հայտնաբերվել են կռապաշտության դարաշրջանին դասվող դամբարաններ, գրում են ադրբեջանական ԶԼՄ-ները՝ չհստակեցնելով, որ Հնագիտության և ազգագրության ինստիտուտի մասնագետները հայտնաբերել են 5 դամբարան Ադրբեջանի Ջալիլաբադի շրջանի Սեիդբազար ավանի մոտ:

Այնտեղ հայտնաբերված խեցեղեն բեկորների վրա պատկերված է երկինք, արև այլ պատկերներ: Մասնագետները նշում են, որ դամբարանները դասվում են զռադաշտության ժամանակաշրջանին: «Պեղումների ժամանակ մենք հայտնաբերեցինք այդ դամբարանները: Հետազոտությունները ցույց են տալիս, որ դրանք դասվում են վաղ Միջնադարին, թվագրվելով III-ից մինչև V-VI դարերը»,-լրագրողներին է ասել հնագիտական արշավախմբի պետ Աբուզեր Ալեկբերովը՝ հավելելով, որ դրանք կապված են «Ադրբեջանում զռադաշտության տարածման հետ»:

Ադրբեջանի Ջալիլաբադի շրջանը գտնվում է Թալիշի տարածաշրջանում, որտեղ բնիկ ժողովուրդը թալիշներն են: Թալիշերենը դասվում է իրանական լեզուների հյուսիս-արևմտյան խմբին, իսկ Ջալիլաբադի շրջանը սահմանակից է Իրանին: Թալիշները դավանում էին զռադաշտություն, այժմ նրանք հիմնականում շիա մահմեդականներ են:

Ադրբեջանի Հանրապետությունը որպես պետություն Բաքու մայրաքաղաքով կազմավորվել է Ռուսական կայսրության անկումից հետո 1918 թ.. թուրքերի աջակցությամբ: