ANCA-ն ողջունում է Հունգարիայի ու Ադրբեջանի իշխանությունների դատապարտումը Օբամայի կողմից

1 սեպտեմբերի 2012 - 13:46 AMT

PanARMENIAN.Net - Ամերիկայի Հայ Դատի հանձնախումբը (ANCA) ողջունում է ԱՄՆ նախագահ Բարաք Օբամայի հայտարարությունը Ռամիլ Սաֆարովին Հունգարիայից Ադրբեջան էքստրադիցիայի մասին, որը 2004թ. Բուդապեշտում կացնահարեց հայ սպա Գուրգեն Մարգարյանին, և որին Բաքուն վերադառնալուն պես ներում շնորհվեց:

ԱՄՆ Ազգային անվտանգության խորհրդի մամլո քարտուղար Թոմի Վիետտորը մեկնաբանել է հայ սպա Գուրգեն Մարգարյանի սպանության համար Հունգարիայում ցմահ բանտարկության դատապարտված Ռամիլ Սֆարովին Հունգարիայի կողմից Ադրբեջանին հանձնելու և նրան ներելու Ադրբեջանի որոշումը: «Նախագահ Բարաք Օբաման լրջորեն մտահոգված է այն հաղորդագրությամբ, որ Ադրբեջանի նախագահ Իլհամ Ալիևը անհապաղ ներում է շնորհել Ռամիլ Սաֆարովին Հունգարիայից վերդառնալուց անմիջապես հետո: Մենք մեր հիասթափությունն ենք հայտնել Ադրբեջանի իշխանություններին Սաֆարովի վերաբերյալ նրանց որոշման առնչությամբ, որը հակասում է լարվածության նվազեցմանը տարածշրջանում և հաշտեցման հաստատմանը: ԱՄՆ-ն նաև բացատրություններ է ակնկալում Հունգարիայից Սաֆարովին Ադրբեջանին արտահանձնելու վերաբերյալ»:

ԱՄՆ Պետդեպարտամենտը նույնպես դատապարտել է Ռամիլ Սաֆարովի էքստրադիցիան ու ներումը: «ԱՄՆ-ն չափազանց մտահոգված է Ռամիլ Սաֆարովին ներում շնորհելու որոշման մասին տեղեկությամբ: Մենք նաև մանրամասն տեղեկատվություն ենք ակնկալում Հունգարիայից Սաֆարովի էքստրադիցիայի մասին»,-հայտարարել է մամլո քարտուղար Պատրիկ Վենտրելը:

ANCA նախագահ Քեն Խաչիկյանը Օբամային հասցեագրված նամակում նշել է, որ «այդ վայրագ սպանության փաստերը հայտնի են: Սա շատ կարևոր է մեր կառավարության համար, որը ԵԱՀԿ ՄԽ համանախագահ է: Մենք պահանջում ենք անհապաղ կրկին դատապարտել Սաֆարովին ցմահ բանտարկության: ԱՄՆ ուժեղ պատասխանի բացակայությունն այդ անարդարությանը խարխլում է խաղաղության հեռանկարներն ու ոգևորում է մինչև ատամները զինված Ադրբեջանի կառավարությանը, որը դրդում է իր քաղաքացիներին բռնության ու սպառնալիքների»:

Հազարավոր ակտիվիստներ արդեն իսկ արձագանքել են Facebook-ում և www.anca.org. զետեղված ANCA հայտարարությանը: Ակտիվիստները կոչ են անում նախագահ Օբամային դատապարտել Սաֆարովի էքստրադիցիան և իրենց բացասական վերաբերմունքն են հայտնում Հունգարիայի իշխանությունների հանդեպ:

Գուրգեն Մարգարյան

2004-ի փետրվարի 19-ին ադրբեջանցի սպա Ռամիլ Սաֆարովը գիշերը կացնահարել է հայ Գուրգենի Մարգարյանին, երբ նա քնած էր: Երկուսն էլ մասնակցում էին Բուդապեշտում ՆԱՏՕ-ի «Գործընկերություն հանուն խաղաղության» ծրագրի շրջանակում կազմակերպված անգլերենի դասընթացներին: Սաֆարովն առաջին հարցաքննության ժամանակ իր արարքի պատճառներն այսպես է բացատրել. «Ափսոսում եմ, որ ոչ մի հայ մինչ այժմ չեմ սպանել... Բանակն ինձ գործուղեց այս դասընթացներին, և այստեղ իմացա, որ մեզ հետ դասընթացներում նաև երկու հայ կա: Ասեմ, որ իմ մեջ ատելություն ծագեց հայերի հանդեպ: Սկզբում բարևում էինք, այսինքն` նրանք էին բարևում, ես չէի պատասխանում: Սպանության պատճառն այն է, որ նրանք անցան մեր մոտով և ժպտացին մեր երեսին: Այդ պահին որոշեցի սպանել նրանց, այսինքն՝ լուսադեմին կտրել գլուխները»:

2006-ի ապրիլի 13-ին Բուդապեշտի առաջին ատյանի դատարանը դատապարտել է Սաֆարովին ցմահ բանտարկության առանց ներման իրավունքի 30 տարվա ընթացքում: 2007-ի փետրվարին Վճռաբեկ դատարանը դատավճիռն ուժի մեջ է թողել:

2012-ի օգոստոսի 31-ին Հունգարիան Ռամիլ Սաֆարովին արտահանձնել է Ադրբեջանին, որտեղ նրան որպես հերոս են դիմավորել: Նախագահ Իլհամ Ալիևը նրան ներելու մասին հրամանագիր է ստորագրել, վճարել 8 տարվա աշխատավարձն ու բարձրացրել զինվորական կոչումը:

Ավելի ուշ Հայստանի ԱԳՆ-ն Հունգարիայի արտգործնախարարությանը տեղեկացրել է երկու պետությունների միջև դիվանագիտական հարաբերությունները կասեցնելու` ՀՀ կառավարության որոշման մասին։