Վիկ Դարչինյանն այս պահին չի համագործակցում փրոմոութերական ընկերությունների հետ

PanARMENIAN.Net - Բռնցքամարտիկ Վիկ Դարչինյանը fightnews.com-ին տված հարցազրույցում ասել է, որ չի համագործակցում որևէ փրոմոութերական ընկերության հետ և գործերը վարում է իր թիմի հետ համատեղ:

«Համագործակցությունը Հարի Շոուի հետ շատ լավն էր, սակայն ես այժմ ցանկանում եմ տարեկան 3-4 մենամարտ անցկացնել չեմպիոնի գոտու համար»,-ասել է Դարչինյանը:

Բռնցքամարտիկը հավելել է, որ առաջիկայում նա մենամարտ չի նախատեսում: «Ես ուղղակի հետաքրքիր առաջարկների եմ սպասում: Եթե ինձ խոստանան լավ մենամարտ կազմակերպել, ես կմեկնեմ, ուր հարկավոր է և շոու ցույց կտամ հանդիսատեսին:

Ինձ համար կարևոր է տիտղոսներ նվաճելը»:

Ըստ Դարչինյանի, նա նախկինի պես մտադիր է ռևանշ խաղ անցկացնել Աբներ Մարեսի և Նոնիտո Դոնեյրի հետ:

«Մարեսը գիտի, որ գողացել է իմ հաղթանակը, նա «կեղտոտ» բռնցքամարտիկ է: Իսկ Դոնեյրը պետք է հանդիպի ոչ թե Խորխե Արսեի, այլ ինձ հետ: Բռնցքամարտի սիրահարները ցանկանում են տեսնել իմ մենամարտը նրա հետ»,-ասել է մարզիկը:

Այն հարցին, թե որքան ժամանակ է նա մտադիր մնալ պրոֆեսիոնալ բռնցքամարտում, Դարչինյանն ասել է. «Չնայած նրան, որ ես շուտով 40 տարեկան կդառնամ, ես ինձ 22-ի եմ զգում: Ես փոխեցի իմ մարտավարությունը և պատրաստ եմ մենամարտել բոլորի հետ»: