ՍԴ-ն հետաձգեց Րաֆֆի Հովհաննիսյանի դիմումի հիման վրա գործի քննությունը

PanARMENIAN.Net - ՀՀ սահմանադրական դատարանն այսօր որոշեց հետաձգել «Ժառանգություն» կուսակցության առաջնորդ Րաֆֆի Հովհաննիսյանի դիմումի հիման վրա գործի քննությունը, որով վիճարկվում էր ՀՀ ընտրական օրենսգրքի 18-րդ հոդվածի 5-րդ մասի և 26-րդ հոդվածի 2-րդ մասի ՀՀ Սահմանադրությանը համապատասխանությունը:

Դատարանը գործը որոշել է քննել գրավոր ընթացակարգով, պատասխանող կողմը ՀՀ Ազգային ժողովն է՝ որպես օրենսգիրքը ընդունած մարմին: Րաֆֆի Հովհաննիսյանի շահերը ներկայացնում են ԱԺ «Ժառանգություն» խմբակցության պատգամավոր Զարուհի Փոստանջյանը և փաստաբան Կարեն Մեժլումյանը:

Գործով զեկուցող նշանակված ՍԴ անդամ Ֆելիքս Թոխյանը նիստի սկզբում հայտարարեց, որ առաջարկում է գործի քննությունը հետաձգել երկու շաբաթով՝ պատճառաբանելով, որ լրացուցիչ փաստաթղթերի և միջազգային փորձի ուսումնասիրության անհրաժեշտություն կա: Դատարանն անմիջապես քննարկեց առաջարկը, ՍԴ նախագահ Գագիկ Հարությունյանն ասաց, որ չի կարծում, թե լրացուցիչ ուսումնասիրությունը բարդություն կստեղծի: Նա նշեց, որ միայն ժամկետի հետ կապված խնդիր կա, քանի որ այդ ընթացքում իրենք այլ գործի քննություն ունեն, այդ օրերին նաև նախատեսված է միջազգային ֆորում: Դատարանը, այս հանգամանքը հաշվի առնելով, որոշեց գործի քննությունը հետաձգել մինչև հուլիսի 16-ը: Հաջորդ դատական նիստը նշանակվեց հուլիսի 16-ին, ժամը՝ 10:00-ին:

Նշենք, որ ՀՀ ԸՕ 18-րդ հոդվածի 5-րդ մասը վերաբերում է թեկնածուների և համամասնական ընտրակարգով ընտրություններին մասնակցող կուսակցությունների /դաշինքների կողմից ընտրական շտաբների ձևավորմանը և դրանց վրա ցուցանակների տեղադրմանը:

Իսկ ՀՀ ԸՕ 26-րդ հոդվածի 2-րդ մասը վերաբերում է թեկնածուների, համամասնական ընտրակարգով ընտրություններին մասնակցող կուսակցությունների/ դաշինքների զանգվածային լրատվության միջոցներով նախընտրական քարոզչության իրականացման, դահլիճների, տարածքների վարձակալման, քարոզչական պաստառների պատրաստման (տեղադրման), քարոզչական տպագիր և այլ նյութերի ձեռքբերման, ընտրողներին տրամադրվող քարոզչական բոլոր տեսակի նյութերի (ներառյալ` տպագիր նյութերի) պատրաստման ֆինանսավորման կարգին: