Աստանայում բացվում է Եվրասիական բարձրագույն տնտեսական խորհրդի նիստը

PanARMENIAN.Net - ՌԴ նախագահ Վլադիմիր Պուտինը կարգարդություն է ստորագրել Եվրասիան տնտեսական միության վերաբերյալ պայմանագիրը ստորագրելու մասին, ասվում է իրավական տեղեկատվության պաշտոնական կայքէջում: «Ընդունել ՌԴ կառավարության առաջարկը Եվրասիական տնտեսական միության վերաբերյալ պայմանագիր ստորագրելու մասին»,- ասվում է փաստաթղթում:

«Նպատակահարմար համարել ստորագրել Պայմանագիրը Եվրասիական բարձրագույն տնտեսական խորհրդի նիստի ընթացքում պետությունների ղեկավարների մակարդակով:

ԵՏՄ մասին պայմանագիրը կսկսի գործել Մաքսային միության տարածքում 2015 թվականի հունվարի 1-ից: Կրեմլում գտնում են, որ այս փաստաթղթի ստորագրումը Ռուսաստանի, Բելառուսի ու Ղազախստանի միջև կարևոր իրադարձություն կդառնա ինտեգրման զարգացման տեսակետից: Նախօրեին ՌԴ նախագահի օգնական Յուրի Ուշակովն ասաց, որ «պայմանագրի կնքումը պատմական իրադարձություն է ինտեգրացիոն գործընթացների զարգացման տեսակետից եվրասիական տարածքում»:

ՌԴ նախագահ Պուտինը ժամանել է Աստանա, որտեղ կմասնակցի Եվրասիական բարձրագույն տնտեսական համաժողովի աշխատանքին: Բելառուսի նախագահ Ալեքսանդր Լուկաշենկոյի ու Ղազախստանի նախագահ Նուրսուլթան Նազարբաևի հետ նա կստորագրի պայմանագիրը, հայտնում է ԻՏԱՐ-ՏԱՍՍ-ը:

Մայիսի 28-ին աշխատանքային այցով Աստանա է մեկնել նաև ՀՀ նախագահ Սերժ Սարգսյանը, նա կմասնակցի Եվրասիական բարձրագույն տնտեսական խորհրդի նիստին, հայտնել է ՀՀ նախագահի մամուլի ծառայությունը: Նախօրեին ՀՀ ԱԳ նախարար Էդվարդ Նալբանդյանը ուղիղ պատասխան չի տվել այն հարցին, թե կստորագրի արդյոք Հայաստանը որևէ փաստաթուղթ եվրասիական ինտեգրման վերաբերյալ մոտ ապագայում:

Մասնավորապես, պատասխանելով այն հարցին, թե կստորագրվի արդյոք որևէ փաստաթուղթ Աստանա ՀՀ նախագահի առաջիկա այցի ժամանակ, որտեղ կայանալու է Եվրասիական բարձրագույն տնտեսական խորհրդի նիստը, նա ասել է, որ եթե ինչ-որ փաստաթղթի ստորագրում նախատեսվեր, այդ մասին կհայտարարվեր: Աստանայում տեղի կունենա այն, ինչի մասին հայտարարվել է, նշել է նախարարը՝ հավելելով. «Կլինի Աստանան՝ կտեսնենք»:

Պայմանագիրը կնքելիս բոլոր երեք կողմերը հրաժարվեցին փաստաթղթի քաղաքականացումից: Այդ մասին հայտնել է Աստանայում ճեպազրույցի ժամանակ Ղազախստանի ԱԳ փոխնախարար Սամատ Օրդաբաևը:

«Իսկ դա նշանակում է, որ ԵՏՄ մասին պայմանագրի կորիզը զուտ տնտեսական փոխգործակցություն է ենթադրում: Հենց շնորհիվ Ղազախստանի հետևողական դիրքորոշման պայմանագրից բացառվեցին բոլոր այն հարցերը, որոնք քաղաքական են՝ ընդհանուր քաղաքացիություն, արտաքին քաղաքականություն, միջխորհրդարանական գործակցություն, անձնագրային ոլորտ, սահմանների ընդհանուր պահպանություն և այլն»,-ասել է նա:

Եվրասիական տնտեսական համաժողովի մասին պայմանագրի նախագծում ձևակերպվել է էներգետիկ շուկայի հիմնարար կառուցվածքը, որով կողմերը պայմանավորվել են, որ 2025 թվականից ոչ ուշ կսկսեն գործել նավթի, նավթամթերքի ու գազի ընդհանուր շուկաները: 2016 թվականին նախագահները կհաստատեն այդ շուկաներից յուրաքանչյուրի ձևավորման հայեցակարգը: 2018 թվականին կհաստատվի այդ շուկաների ձևավորման ծրագիրը:

Ընդհանուր շուկաների աշխատանքը գործարկելու համար հարկ կլինի հատուկ միջազգային պայմանագրեր ստորագրել: Մինչ 2025 թվականը այդ հարցերը կկարգավորվեն ըստ 2010 թվականին կնքված համաձայնգարերի: Ինչ վերաբերում է ՄՄ և ԵՏՄ Հայաստանի միանալու մասին պայմանագրին, ապա փաստաթուղթը պատրաստ կլինի մինչև հունիսի 1-ը և կներկայացվի ԵՏՄ պետությունների ղեկավարներին նիստում, որը կանցնի մայիսի 29-ին Աստանայում:

Սեպտեմբերի 3-ին Ռուսաստանի նախագահ Վլադիմիր Պուտինի հետ հանդիպման ավարտին Հայաստանի նախագահ Սերժ Սարգսյանը հայտարարեց Մաքսային միությանը միանալու և հետագայում Եվրասիական տնտեսական միության ձևավորմանը մասնակցելու Հայաստանի մտադրության մասին:

Էկոնոմիկայի նախկին նախարար Վահրամ Ավանեսյանն ապրիլի 17-ին լրագրողների հետ հանդիպմանը հայտարարեց, որ ապրիլի 29-ին Մինսկում կայանալիք Եվրասիական բարձրագույն տնտեսական խորհրդի նիստին Հայաստանը ստորագրելու է Մաքսային միությանն անդամակցելու փաստաթուղթը, սակայն հաջորդ օրը հայտարարեց, որ ՄՄ-ին անդամակցելու մասին պայմանագիրը կստորագրվի միայն այն ժամանակ, երբ ավարտվեն բանակցությունները մի շարք ներկրվող ապրանքների մաքսատուրքերը պահպանելու վերաբերյալ:

Հայաստանի վարչապետ Տիգրան Սարգսյանը մարտի 24-ին, Ծաղկաձորում միջազգային գիտաժողովում հայտարարեց, որ Հայաստանը կատարել է Մաքսային միությանը միանալու «Ճանապարհային քարտեզով» նախատեսված գործողությունների մեծ մասը և սպասվում է, որ մայիսին արդեն կստորագրվի ՄՄ-ին ու Միասնական տնտեսական գոտուն միանալու պայմանագիրը։ Վարչապետի խոսքով՝ հունիսին չորս երկրների (Ռուսաստանի, Ղազախստանի, Բելառուսի և Հայաստանի) խորհրդարանները պետք է հաստատեն այդ փաստաթուղթը, և 2015-ի հունվարի 1-ից Հայաստանը կդառնա Մաքսային միության անդամ, գրում է «Ազատություն» ռադիոկայանը։

Մարտի 5-ին բացելով Եվրասիական տնտեսական գերագույն խորհրդի նիստը պետությունների ղեկավարների մակարդակով, ՌԴ նախագահ Վլադիմիր Պուտինը հայտարարել էր, որ Ռուսաստանը, Բելառուսն ու Ղազախստանը պատրաստ են ձեռնամուխ լինել ԵՏՀ-ին Հայաստանի միանալու մասին պայմանագրի նախապատրաստմանը: «Հայկական կողմն ընդունել և հաջողությամբ իրականացնում է միջոցառումների ցանկը, որոնք անհրաժեշտ են Մաքսային միությանն անդամակցելու համար ու ԵՏՀ պահանջներին ու նորմերին համապատասխանելու համար»,- ասել էր Ռուսաստանի նախագահը` հավելելով, որ արդեն հնարավոր է անցնել ապագա Եվրասիական տնտեսական միությանը Հայաստանի միանալու մասին պայմանագրի նախագծի նախապատրաստմանը:

Ավելի վաղ ՀՀ ԱԳ փոխնախարար Շավարշ Քոչարյանը հայտարարեց, որ ապրիլի կեսին կավարտվի ՄՄ-ին անդամակցելու «Ճանապարհային քարտեզով» նախատեսված գործընթացը: Նա հավելեց, որ զուգահեռ նախապատրաստվում է նաև համաձայնագիրը:

«ՄՄ անդամ երկրներն ու Հայաստանը պետք է համաձայնության գան համաձայնագրի վերաբերյալ, որից հետո այն կներկայացվի ԱԺ վավերացմանը: Այժմ բարդ է ասել, թե հատկապես երբ այն կներկայացվի խորհրդարանին»,- ասել էր նա: Հունվարի 23-ի նիստում ՀՀ կառավարությունը հաստատել էր «Ճանապարհային քարտեզով» նախանշված միջոցառումների ժամանակացույցը, որը ներառում է 20 բաժին, 262 միջոցառում, որից 150 պետք է իրականացվի մինչ ՄՄ-ին անդամակցելը: