ԱՄՆ. ՌԴ դեմ պատժամիջոցներն աստիճանաբար կհանվեն, գլխավոր պայմանը հրադադարն է Ուկրաինայում

11 հոկտեմբերի 2014 - 11:43 AMT

PanARMENIAN.Net - Ռուսաստանի դեմ պատժամիջոցների թուլացման շուրջ բանակցությունները կարող են սկսվել առաջիկա շաբաթներին, ինչը կախված կլինի հրադադարից Ուկրաինայում: Այդ մասին, ըստ ՌԻԱ Նովոստի գործակալության, հայտարարել է ԱՄՆ վարչակազմի ազգային անվտանգության գծով խորհրդականի տեղակալ Թոնի Բլինկենը:

Բլինկենն ասել է, որ Ռուսաստանի դեմ պատժամիջոցներն աստիճանաբար կհանվեն, միայն եթե հրադադարի մասին պայմանավորվածությունները կյանքի կոչվեն:

Սակայն, ըստ նրա, իրավիճակն Ուկրաինայում կարող է ազդել նաև պատժամիջոցների խստացման առումով:

Եվրամիությունն ու ԱՄՆ-ն պատժամիջոցներ սահմանեցին Ռուսաստանի դեմ, քանի որ վերջինս, իրենց տվյալներով, աջակցում է զենքով ու զորքով Ուկրաինայի արևելքում կռվող աշխարհազորին:

Անցած ամիս ՌԴ, Ուկրաինայի և աշխարհազոի ներկայացուցիչները Մինսկում պայմանավորվեցին հրադադարի մասին:

Արևմտյան երկրների կողմից Ռուսաստանի դեմ սահմանված պատժամիջոցները Ուկրաինայի արևելքում իրավիճակի պատճառով նվազեցրել են տնտեսության աճի տեմպերը, սաստկացրել գնաճն ու ռուբլու անկումը: 2014-ի ավարտին ԱՄՀ-ն ակնկալում է ՌԴ-ում ՀՆԱ 0,3 տոկոս աճ:

Պատժամիջոցներ են սահմանվել մի շարք բանկերի, պաշտպանական հատվածի ու էներգետիկ ընկերությունների դեմ: Ռուսական ընկերություններին արգելել են վարկեր վերցնել Արևմուտքում 30 օրից ավելի ժամկետով, արգելված է երկակի նշանակության ապրանքների արտահանումը Ռուսաստան, նախատեսված հորատման և երկրաբանական հետախուզության համար: Ռուսաստանը պատասխանեց սնդդամթեքի ներկրման էմբարգոյով:

Զինված հակամարտությունն Ուկրաինայի արևելքում շարունակվում է 2014-ի ապրիլից և Կիևում «Մայդանի», Յանուկովիչի պաշտոնանկության և Ռուսաստանին Ղրիմի միանալու հետևանքներից մեկն է: Դոնեցկի և Լուգանսկի ինքնահռչակ հանրապետությունների ուժերը, վերցնելով իշխանությունը տարածաշրջանում, պահանջում են ավելի լայն լիազորություններ կամ անկախություն, որին Կիևը պատասխանեց մարտական գործողություններով և ուժով ապստամբությունը ճնշելու փորձով: Մարտերի արդյունքում, որոնք շարունակվում են արդեն մի քանի ամիս, կենտրոնական իշխանությունը կորցրեց վերահսկողությունը Դոնեցկի և Լուգանսկի մի մասի հանդեպ, զոհվեց մոտ 3,5 հազար մարդ, փախստական դարձավ մոտ 800 հազարը: Գերության մեջ են հարյուրավոր ուկրաինացի զինվորներ:

Հղումներ թեմայով.

РБК: США могут пересмотреть санкции против России

Reuters. Russian sanctions could be eased soon if Ukraine progress made - U.S. adviser