Ամերիկյան Վերմոնտի օրենսդիր մարմինը Հայոց ցեղասպանության մասին բանաձև է ընդունել

1 ապրիլի 2015 - 12:49 AMT

PanARMENIAN.Net - Ամերիկյան Վերմոնտ նահանգի օրենսդիր մարմինը Հայոց ցեղասպանության 100-րդ տարելիցի առթիվ միաձայն ընդունել է H.C.R. 86 բանաձևը՝ շարունակելով օգնել ցեղասպանությունների կանխարգելման շարժմանը և հիշատակի միջոցառումների օր սահմանելով մարդկության դեմ հանցագործության զոհերի համար, տեղեկացնում են Ամերիկայի Հայ Դատի հանձնախմբի Արևելյան շրջանի գրասենյակից:

Նահանգային օրենսդրի նիստին մասնակցել են ամերիկահայ գրողներ Քրիս Բոհջալյանը և Դանա Ուալռեթը, որոնց նախնիները Ցեղասպանությունը վերապրածներն են: Նրանք ներկայացրել իրենց ընտանիքների պատմությունը, Ցեղասպանության 8 փուլերը և թուրքական ժխտողականությունը:

«Ճանաչելով Հայոց ցեղասպանությունը Վերմոնդի օրենսդիրները ձայն տվեցին հավերժ լռեցված հազարավոր հայերի: Վերմոնտն այս կերպ օգնում է տարածել ճշմարտությունը անատոլիական հարթավայրում և սիրիական անապատում մեկ դար առաջ տեղի ունեցածի մասին, իջեցնել ժխտողականութան տոնը», -ասել է Քրիս Բոհջալյանը, իսկ Դանա ՈՒալռեթն ընդգծել է, որ Ցեղասպանությունը շարունակվում է, քանի դեռ Թուրքիայի իշխանությունները շարունակում են ժխտել փաստերը:

Վերմոնտ նահանգը Հայոց Ցեղասպանությունը ճանաչել է, երբ նահանգապետ Ջեյմս Դուգլասը 2004-ին ապրիլի 24-ը հռչակեց հայ նահատակների հիշատակի օր: ԱՄՆ 50 նահանգներից 43-ը պաշտոնապես ճանաչել են Հայոց ցեղասպանության փաստը:

Հղումներ թեմայով.

http://www.burlingtonfreepress.com/story/news/politics/2015/03/31/vt-lawmakers-acknowledges-armenian-genocide/70747964/

Հայոց ցեղասպանություն

Հայոց ցեղասպանությունը, որն իրագործվել է Օսմանյան կայսրությունում 1915-1923թթ., XX դարի առաջին ցեղասպանությունն էր, որի նախաձեռնողները երիտթուրքերն էին: Ցեղասպանության ժամանակ ոչնչացվեց վեց հայկական վիլայեթների բնակչությունը` մոտ 1,5 մլն հայ: Եվս կես միլիոնը սփռվեց աշխարհով մեկ` սկիզբ դնելով հայկական Սփյուռքին:

Դեռևս Ցեղասպանության իրագործման տարիներին` 1915-23թթ. տերությունները ընդունեցին հայերի կոտորածը դատապարտող բանաձևեր: ԱՄՆ-ն երեք անգամ (1916, 1919, 1920) նմանատիպ բանաձևեր է ընդունել, սակայն դա չկասեցրեց Օսմանյան կայսրության գործողությունները: 1915թ. Ֆրանսիան, Մեծ Բրիտանիան և Ռուսաստանը հանդես եկան համատեղ հռչակագրով` դատապարտելով հայերի բնաջնջումը:

Աշխարհի շատ երկրներ և ազդեցիկ միջազգային կազմակերպություններ ճանաչել և դատապարտել են Հայոց ցեղասպանությունը: Պաշտոնապես առաջինը Հայոց ցեղասպանությունն ընդունել և դատապարտել է Ուրուգվայը 1965թ-ին: Հայոց ցեղասպանությունը ճանաչել են նաև Եվրոպայի Խորհուրդը, Եվրախորհրդարանը, ՄԱԿ-ի խտրականության կասեցման և փոքրամասնությունների պաշտպանության կանխարգելման ենթահանձնաժողովը, ՄԱԿ-ի ռազմական հանցագործությունների գծով հանձնաժողովը, Եկեղեցիների համաշխարհային խորհուրդը: Հայերի ոչնչացումը պաշտոնապես ցեղասպանություն են ճանաչել Ֆրանսիան, Ավստրիան, Իտալիան, Գերմանիան, Բելգիան, Լյուքսեմբուրգը, Շվեդիան, Նիդերլանդները, Շվեյցարիան, Ռուսաստանը, Լեհաստանը, Լիտվան, Հունաստանը, Սլովակիան, Կիպրոսի Հանրապետությունը, Լիբանանը, Ուրուգվայը, Արգենտինան, Վենեսուելան, Չիլին, Բոլիվիան, Կանադան, Վատիկանը, Բրազիլիան, Լյուքսեմբուրգը, Գերմանիան, Պարագվայը, Սիրիան և ԱՄՆ-ի 45 նահանգ:

Բելգիայում և Շվեդիայում Հայոց ցեղասպանության ժխտման համար քրեական պատասխանատվություն է սահմանված (45 հազար եվրո տուգանքից մինչև 1 տարվա ազատազրկում): 2006թ. հոկտեմբերի 12-ին Ֆրանսիայի խորհրդարանն օրինագիծ ընդունեց, որի համաձայն Հայոց ցեղասպանության ժխտումը կքրեականացվի, ինչպես Հոլոքոսթը:

Ժամանակակից Թուրքիան ժխտում է Հայոց ցեղասպանության պատմական փաստը և վարում է այդ փաստի ժխտման ներքին և արտաքին քաղաքականություն: Թուրքական պետության գործողությունները ներկայացվում են որպես «բռնագաղթ»` հայերի անվտանգությունն ապահովելու նպատակով: Հայոց ցեղասպանության ճանաչման անհրաժեշտության մասին խոսում են միայն առանձին թուրք մտավորականներ, որոնց թվում են պատմաբան Թաներ Աքչամն ու Նոբելյան մրցանակի դափնեկիր Օրհան Փամուկը: