ԱՄՆ-ում վախճանվել է Մուհամեդ Ալին

PanARMENIAN.Net - ԱՄՆ-ում 74 տարեկանում կյանքից հեռացել է գերծանր քաշային կարգում աշխարհի նախկին չեմպիոն, լեգենդար բռնցքամարտիկ Մուհամեդ Ալին: Տեղեկությունը հաստատել է մարզիկի ընտանիքի ներկայացուցիչը, փոխանցում է NBC News-ը, հայտնում է Tert.am-ը:

Վերջին օրերը բռնցքամարտիկն անցկացրել է Ֆինիքս քաղաքի մոտակայքում գտնվող հիվանդանոցում, ուր հայտնվել էր շնչառական օրգանների խնդիրների բարդացման հետևանքով:

Հոգեհանգիստը կկայանա նրա հայրենի Լուիսվիլ քաղաքում` Կենտուկի նահանգում:

Մուհամեդ Ալի աֆրոամերիկացի նշանավոր պրոֆեսիոնալ ծանրքաշային կարգի բռնցքամարտիկ էր, մարդասեր և հասարակական գործիչ: Ալին 1960 թ. 17-րդ ամառային Օլիմպիական խաղերի չեմպիոն է` թեթև ծանրքաշային կարգում, ծանրքաշային կարգում աշխարհի բացարձակ չեմպիոն (1964-1966, 1974-1978), 5 անգամ արժանացել է «Տարվա բռնցքամարտիկ» տիտղոսին (1963, 1972, 1974, 1975, 1978), ըստ The Ring ամսագրի՝ «Տասնամյակի բռնցքամարտիկ» (1970-ականներ), պատմության մեջ 2-րդ բռնցքամարտիկը, ով Sports Illustrated ամասագրի կողմից արժանացել է «Տարվա մարզիկ» կոչմանը: 1974-ին մի քանի սպորտային հանդեսների կողմից ճանաչվել է «Դարի մարզիկ»: Կարիերայի ավարտին ընդգրկվել է Բռնցքամարտի փառքի սրահում (1987) և Բռնցքամարտի միջազգային փառքի սրահում (1990):

Տառապել էր Պարկինսոնի հիվանդությամբ: