ԱՄՆ Կոնգրես. Բաքուն կայունություն չի ստանա` խախտելով խոսքի ազատությունը

PanARMENIAN.Net - Ամերիկացի օրենսդիրները և իրավապաշտպան խմբերը հուլիսի 14-ին հորդորել են աշխարհի բռնատիրական իշխանություններին, այդ թվում Ադրբեջանի, հրաժարվել այլախոհների հանդեպ անհանդուրժողականությունից և դադարեցնել ճնշումը քաղաքացիական հասարակության և մամուլի վրա:

«Ոչ մի երկիր չի կարող կայունության հասնել` խախտելով խոսքի ազատությունը»,-ասել է կոնգրեսական, մարդու իրավունքների հանձնաժողովի համանախագահ Ջիմ Մաքգովերնը` բացելով ԱՄՆ Կոնգրեսում կազմակերպված լսումները:

Բռնատիրական երկրների շարքում կոնգրեսականը մատնանշել է նաև Ադրբեջանը: Նա հիշեցրել է, որ այդ երկրի իշխանությունները միջազգային ճնշման արդյունքում վերջերս ազատ արձակեցին բանտից հայտնի լրագրող Խադիջա Իսմայլովային: «Սակայն միաժամանակ բանտ նետվեցին այլ ակտիվիստներ, լրագրողներ»,-ասել է նա:

Կոնգրեսականը հավելել է նաև, որ հարևան Թուրքիայում իշխանությունները սեփական խմբագրակազմն են պարտադրել հայտնի լրատվամիջոցին, հայտնում է «Թուրանը»:

Ըստ միջազգային իրավապաշտպան կազմակերպությունների, Ադրբեջանը առաջատար է հարևան երկրների շարքում լրագրողների հետապնդման և խոսքի ազատության սահմանափակումներով: Նրանք նաև մտահոգություն են հայտնել, որ լրագրողների հանդեպ բռնություն գործադրողները հաճախ անպատիժ են մնում:

Ավելի վաղ Freedom House իրավապաշտպան կազմակերպությունը հայտնել էր, որ ազատ արձակելով 24 քաղաքական ու կրոնական ակտիվիստի, Ադրբեջանի իշխանությունները, կարծես, ձգտում են «ազատված բանտախցերը լցնել ազատության նոր պաշտպաններով»:

Մայիսի 9-ի ուշ երեկոյան` Ադրբեջանի նախկին նախագահ Հեյդար Ալիևի ծննդյան օրվա` մայիսի 10-ի նախօրեին, Բաքվի Կենտրոնական բանկի դիմաց գտնվող զբոսայգում Հեյդար Ալիևի հուշարձանի պատվանդանին գրաֆիտի է հայտնվել:

Ադրբեջանն անազատ երկրիր է համարվում անազատ մամուլով: