Աբրահամ-Լիհաուգ. Բուքմեյքերներն արել են ընտրությունը

PanARMENIAN.Net - Պրոֆեսիոնալ բռնցքամարտի սուպերմիջին քաշային կարգում աշխարհի նախկին չեմպիոն Արթուր Աբրահամը հուլիսի 16-ին կանցկացնի կարիերայի 50-րդ մենամարտը:

Ինչպես հայտնի է, Բեռլինում կայանալիք մենամարտում հայ բռնցքամարտիկի մրցակիցը կլինի նորվեգացի Թիմ Ռոբին Լիհաուգը: William Hill բուքմեյքերական գրասենյակը ֆավորիտ է համարում Աբրահամին, որի հաղթանակը գնահատում է 1.05 գործակցով: 23-ամյա նորվեգացու հաղթանակի համար սահմանվել է 9 գործակից, իսկ ոչ ոքիի համար՝ 29:

Մրցելույթը ցուցադրվելու է գերմանական SAT1 TV-ի (սկիզբը` Բեռլինի ժամանակով ժամը 22:50 հատվածում) եւ Հայաստանի Հանրային հեռուստաընկերության ուղիղ եթերում (սկիզբը` Հայաստանի ժամանակով հուլիսի 16-ի լույս 17-ի գիշերը, ժամը 00:50-ի հատվածում, հայտնում է Armlur.am-ը:

Արթուր Աբրահամը մենամարտից առաջ շեշտել է, որ իր համար կարևոր է աշխարհի չեմպիոնի տիտղոսը վերադարձնելը և հուլիսի 16-ի մենամարտը քայլ է դեպի իր մեծ նպատակը, տեղեկացնում է Աբրահամի մամուլի քարտուղար Սիրան Գրիգորյանը:

WBO վարկածի 2-րդ կիսամիջին քաշային կարգի աշխարհի չեմպիոն Արթուր Աբրահամն ապրիլի 10-ին կայացած մենամարտում պարտվել է մեքսիկացի Խիլբերտո Ռամիրեսին: Լաս Վեգասում կայացած մրցավեճում պարտությունն Աբրահամին զրկեց չեմպիոնական տիտղոսից:

2016-ի փետրվարին Աբրահամը կրկին ճանաչվել է Գերմանիայի տարվա լավագույն բռնցքամարտիկ: Այս տիտղոսին հայ բռնցքամարտիկն արժանանում է արդեն 7-րդ անգամ: 2015-ի դեկտեմբերին Արթուր Աբրահամին է շնորհվել «Բեռլինի չեմպիոն-2015» մրցանակը:

«Արթուր արքան» պաշտպանել է WBO վարկածով աշխարհի չեմպիոնի տիտղոսը՝ 2015-ի հուլիսի 18-ին հաղթանակ տանելով գերմանացի Ռոբերտ Շտիգլիցի նկատմամբ:

Աբրահամն IBF վարկածով միջին քաշային կարգում աշխարհի չեմպիոնի տիտղոս է ունեցել 2005-2009-ին։ Բազմաթիվ անգամ ճանաչվել է Գերմանիայի լավագույն բռնցքամարտիկ։