Հայոց ցեղասպանության հարցն ակտիվ քննարկման առարկա է բուլղարական հասարակության շրջանում

PanARMENIAN.Net - Հայոց ցեղասպանության հարցն ակտիվ քննարկման առարկա է բուլղարական հասարակությունում, լրագրողներին է հայտարարել է Հայաստանում Բուլղարիայի դեսպան Ստեֆան Դիմիտրովը: «Այդ խնդրի լուծումն օգտակար կլինի ոչ միայն Հայաստանի, այլ նաեւ ողջ մարդկության համար»,-հայտարարել է դիվանագետը: Նա ընդգծել է, որ թեեւ Հայոց ցեղասպանության վերաբերյալ օրինագիծը 2006 թվականին չհաստատվեց Բուլղարիայի խորհրդարանի կողմից, սակայն այդ հարցի կարեւորության գիտակցումը շատ ավելի ակտիվ սկսեց զարգանալ: Դիմիտրովը նշել է, որ Բուլղարիայի խորհրդարանը հարգել է Հայոց ցեղասպանության զոհերի հիշատակը, եւ, անշուշտ, ճանաչում է Հայոց ցեղասպանության խնդրի շուտափույթ լուծման անհրաժեշտությունը: «Որպես մասնագիտությամբ պատմաբան ես հավատում եմ պատմությանը, եւ համոզված եմ, որ այն ամեն ինչ իր տեղը կդնի»,-ասել է Դիմիտրովը, հաղորդում է «Նովոստի-Արմենիա» գործակալությունը:



2007 թվականին Հայոց ցեղասպանության զոհերի հիշատակի օրը` ապրիլի 24-ին Բուլղարիայում, մասնավորապես, Սոֆիայում, Պլովդիվում, Վառնայում եւ Բուրգասում տեղի ունեցան մի շարք միջոցառումներ Հայոց ցեղասպանության 92-ամյակի կապակցությամբ:



Հաջորդ օրը Բուլղարիայի Ազգային Ժողովի նախագահ Գեորգի Պիրինսկու առաջարկությամբ ԱԺ հերթական նիստը սկսվեց լռության րոպեից ի հիշատակ Հայոց ցեղասպանության զոհերի: Այնուհետեւ պատգամավորներից մեկը հռչակագիր ներկայացրեց «Բուլղարական ժողովրդական միություն» խորհրդարանական խմբին, որով դատապարտվում եւ ճանաչվում է Ցեղասպանությունը: Այժմ Բուլղարիայի ԱԺ-ում ստորագրահավաք է ընթանում օրակարգում Հայոց ցեղասպանության ճանաչման եւ դատապարտման մասին հռչակագիրն ընդգրկելու վերաբերյալ: