Կարլսենը պաշտպանել է շախմատի աշխարհի չեմպիոնի կոչումը

PanARMENIAN.Net - Նյու Յորքում ավարտված շախմատի աշխարհի չեմպիոնի կոչման համար մրցամարտում Կարլսենը հաղթել է հավակնորդ, ռուս գրոսմայստեր Սերգեյ Կարյակինին՝ թայ-բրեյքում, 3:1 հաշվով:

Այսպիսով, նորվեգացի շախմատիստը պաշտպանել է շախմատի աշխարհի չեմպիոնի տիտղոսը:

Արագ շախմատի առաջին երկու պարտիայում մրցակիցները ոչ ոքի են խաղացել: Երկու պարտիայում Կարլսենն առավելության է հասել՝ սևերով և սպիտակներով:

Գլխավոր մրցամարտի 12 պարտիայից հետո 6։6 հավասար հաշիվը նշանակում էր, որ շախմատի աշխարհի չեմպիոնի կոչման համար մրցակիցները կհանդիպեն թայ-բրեյքում՝ նոյեմբերի 30-ին (երկուսն էլ մեկական հաղթանակ են տոնել)։ Նրանք 4 խաղ են անկացրել 25-ական րոպե ժամանակով, որին գումարվել է 10 վայրկյան՝ յուրաքանչյուր քայլի համար։

Սվեն Մագնուս Կարլսենը ծնվել է 1990-ի նոյեմբերի 30-ին Տյոնսբերգում: Նորվեգացի շախմատիստ է, գրոսմայստեր, աշխարհի 16-րդ չեմպիոն, աշխարհի շախմատիստների վարկանիշային աղյուսակում թիվ 1 շախմատիստ։

Նա աշխարհի ամենաերիտասարդ գրոսմայստերներից երրորդն է՝ Սերգեյ Կարյակինից և Պարիմարյան Նեգիից հետո։

Նրա 2882 վարկանիշը ամենաբարձրն է շախմատի պատմության ամբողջ ընթացքում։ Բացի շախմատից Կարլսենը զբաղվում է ֆուտբոլով, դահուկասահքով, մեծ թենիսով, բասկետբոլով։