ԶԼՄ-ներ. Բելգիան մտադիր է արգելել թուրք քաղաքական գործիչների այցերը

14 մարտի 2017 - 11:16 AMT

PanARMENIAN.Net - Բելգիայում պահանջել են չեղարկել թուրք քաղաքական գործիչների այցերը: Այդ օրինակին կարող են հետևել նաև եվրոպական այլ պետություններ: Այդ մասին հայտարարել է Բելգիայի ընդդիմադիր «Ֆլամանդական շահ» կուսակցության ղեկավար Թոմ Վան Գրիկենը: Իրենց դիրքորոշումը նրանք մտադիր են ներկայացնել խորհրդարանում, հայտնում է «Իզվեստիան»:

«Մենք լիովին հավանություն ենք տալիս Նիդերլանդների քաղաքականությանը Թուրքիայի հարցում: Այլ պետությունները չպետք է ազդեն քաղաքական իրավիճակի վրա Եվրոպայում: Թուրք պաշտոնյաներն ուզում էին հանրահավաք անցկացնել ազգությամբ թուրք Նիդերլանդների բնակիչների հետ: Դա ուղիղ միջամտություն է ԵՄ ներքին գործերին»,-ասել է բելգիացի պատգամավորը:

Նիդերլանդների հետ համերաշխություն են հայտնել նաև Գերմանիայի, Ավստրիայի և Դանիայի քաղաքական գործիչները: Նրանց կարծիքով հանդիպումը Թուրքիայի ղեկավար անձանց հետ կնշանակի, որ Եվրոպան ավելի մեղմ է վերաբերում Անկարայի գործողություններին, քան կա իրականում: Փորձագետները վստահ են, որ Թուրքիայի և Նիդերլանդների միջև ճգնաժամը կանդրադառնա Եվրոպայի երկրների վրա, որոնք կարող են համախմբվել և ճնշում գործադրել Թուրքիայի ղեկավարության վրա:

Թուրքիայի և Նիդերլանդների միջև քաղաքական ճգնաժամի խորացման ֆոնին Անկարան հայտարարել է, որ խզում է դիվանագիտական կապերն այդ երկրի իշխանությունների հետ:Իրավիճակի սրման համար առիթ էր հանդիսացել Նիդերլանդների վարչապետ Մարկ Ռյուտեի կողմից թուրք նախարարների քարոզարշավի կազմակերպման արգելքը Ռոտերդամում:

Ավելի վաղ ԵՄ-ն հորդորել է Թուրքիային ձեռնպահ մնալ «ավելորդ հայտարարություններից» և գործողություններից Նիդերլանդների հետ կապված սկանդալի ֆոնին:

Հղումներ թեմայով.

Izvestia.ru. В Бельгии хотят запретить визиты турецких политиков