«Արսենալի» և «Չելսիի» խաղի տոմսերի կեսից ավելին չի իրացվել՝ 6000 տոմս կվերադարձվի

23 մայիսի 2019 - 11:45 AMT

PanARMENIAN.Net - Լոնդոնի «Արսենալն» ու «Չելսին» Եվրոպայի լիգայի Բաքվում կայանալիք եզրափակիչ հանդիպման ավելի քան 6000 տոմս կվերադարձնեն ՈւԵՖԱ-ին, հայտնում է Times-ը:

Ըստ աղբյուրի, ակումբները չեն կարողացել իրացնել իրենց երկրպագուներին հատկացված քվոտայով տոմսերի կեսից ավելին: Այս պահի դրությամբ «Արսենալը» 3500 տոմս է վաճառել, «Չելսին»՝ մոտ 2000: Պահանջարկի բացակայությունը բացատրվում է ավիաչվերթի բարձր արժեքով, Բաքվի օդանավակայանի փոքր թողունակությամբ, խաղի մեկնարկի ուշ ժամով, ինչպես նաև Բաքվի հյուրանոցներում գների կտրուկ աճով, գրում է ՌԻԱ Նովոստին:

Նշվում է նաև, որ կարող է վերադարձվել նաև այն 2000 տոմսի զգալի մասը, որոնք հատկացվել էին ՈւԵՖԱ հովանավորների համար: Եթե ակումբները չկարողանան իրացնել իրենց քվոտան և վերադարձնեն տոմսերը, դրանք վաճառքի կհանվեն տեղացի երկրպագուների համար: Այս պահի դրությամբ ընդհանուր առմամբ 23,000 տոմս է վաճառվել:

Լոնդոնի «Արսենալ» ֆուտբոլային ակումբը պաշտոնապես հայտարարել է, որ ակումբի և Հայատսանի հավաքականի կիսապաշտպան Հենրիխ Մխիթարյանը չի մեկնի Բաքու՝ Եվրոպայի լիգայի եզրափակիչ հանդիպմանը «Չելսիի» հետ: «Մենք մեծ հիասթափությամբ հայտարարում ենք, որ Հենրիխ Մխիթարյանը թիմի հետ չի մեկնի ՈւԵՖԱ Եվրոպայի լիգայի եզրափակիչ խաղին: Մենք մանրակրկիտ կերպով ուսումնասիրել ենք Միկիի մասնակցության բոլոր տարբերակները, սակայն, քննարկելով հարցը Միկիի և նրա ընտանիքի հետ, միասին պայմանավորվել ենք, որ նա չի մասնակցի մեր թիմի արտագնա խաղին»,-ասվում է «Արսենալի» հայտարարության մեջ:

Amnesty International իրավապաշտպան կազմակերպությունը հայտարարություն է տարածել՝ անդրադառնալով ՈւԵՖԱ Եվրոպայի լիգայի եզրափակիչ խաղը Բաքվում անցկացնելու որոշմանն ու Հայաստանի հավաքականի կիսապաշտպան Հենրիխ Մխիթարյանի շուրջ ստեղծված իրավիճակին:

Հղումներ թեմայով.

Ria.ru. СМИ: "Арсенал" и "Челси" вернут УЕФА более 6000 билетов на финал ЛЕ в Баку

The Sun. NOT QUITE THE TICKET Europa League final to be played in front of thousands of empty seats after sponsors send back tickets and Arsenal and Chelsea fail to sell out allocation