Բաքուն և Անկարան 2019-ին 13 համատեղ զորավարժություն կանցկացնեն

12 հունիսի 2019 - 15:40 AMT

PanARMENIAN.Net - Ադրբեջանն ու Թուրքիան 2019-ին 13 համատեղ զորավարժություն կանցկացնեն: Այդ մասին հայտարարել է Ադրբեջանի պաշտպանության նախարար Զաքիր Հասանովն ադրբեջանական Գաբալայում՝ Ադրբեջանի, Թուրքիայի և Վրաստանի պաշտպանության նախարարների եռակողմ հանդիպման ավարտին տեղի ունեցած ճեպազրույցում:

«Հատուկ ուզում եմ նշել, որ ռազմական համագործակցության ոլորտում զորավարժություններն առանձնահատուկ տեղ են զբաղեցնում: Ամեն տարի դրանց քանակն ավելանում է: Եթե 2018-ին Ադրբեջանն ու Թուրքիան 7 համատեղ զորավարժություն են անցկացրել, ապա 2019-ին 13 զորավարժություն կանցկացնեն»,-ասել է Հասանովը, հայտնում է Interfax.az-ը:

Նա հավելել է, որ Ադրբեջանն ու Թուրքիան հրավիրել են Վրաստանին մասնակցել այդ զորավարժություններին՝ հաջող գնահատելով եռակողմ գործակցության ձևաչափը:

Վրաստանի պաշտպանության նախարար Լևան Իզորիան իր հերթին հայտարարել է, որՎրաստանն առաջիկայում կմասնակցի Ադրբեջանի և Թուրքիայի կողմից անցկացվող համատեղ զորավարժություններին:

Հասանովը նաև հավելել է, որ Ադրբեջանն ու Վրաստանը նույնպես սատարում են Թուրքիային ահաբեկչության դեմ պայքարում և սատարում են «միմյանց տարածքային ամբողջականությանը»:

Ադրբեջանն ու Թուրքիան հունիսի 7-13-ը համատեղ զորավարժություններ են անցկացրել Նախիջևանում: Մարտական կրակով համատեղ մարտավարական «Անխախտելի եղբայրություն-2019» զորավարժություններն անցել են ըստ երկրների միջև Ռազմական համագործակցության մասին համաձայնագրի:

Հղումներ թեմայով.

Interfax.az. Баку и Анкара увеличат в 2019 году число совместных учений до 13 – министр обороны Азербайджана