Հայաստանում Ֆրանսիայի դեսպանատունը հոկտեմբերից մուտքի արտոնագրեր է տրամադրելու միայն բիոմետրիկ պարամետրերի հիման վրա

PanARMENIAN.Net - Ֆրանսիայի տարածքում անվտանգության բարձրացման, ինչպես նաեւ ապօրինի ներգաղթի դեմ պայքարի, մասնավորապես, կապված փաստաթղթերի կեղծման հետ, արդյունավետության բարձրացման նպատակով, 2008թ. հոկտեմբերի 6-ից Հայաստանում Ֆրանսիայի դեսպանատունը մուտքի արտոնագրեր է տրամադրելու միայն բիոմետրիկ պարամետրերի հիման վրա: Այդ մասին այսօր լրագրողներին է հաղորդել Հայաստանում Ֆրանսիայի հյուպատոս Ժակի Շարոթը:



Ըստ հյուպատոսի, ըստ նոր համակարգի պահանջների, արտոնագրեր ստանալու համար դիմած բոլոր անձանց ներկայությունը պարտադիր կլինի: Նրանցից կպահանջեն նաեւ մատնահետքերի հանձնում եւ թվայնացված լուսանկար: Ինչպես հավաստիացրեց Շարոթը, այս բոլոր գործողությունները մի քանի րոպե կտեւեն: «Այս համակարգն արդեն ներդրվել է արտերկրում Ֆրանսիայի 20 դեսպանատներում, այդ թվում նաեւ Վրաստանում: 2009թ. ի վեր եւս 50 դեսպանատներում կներդրվի այդ համակարգը»,-հաղորդել է ՀՀ-ում Ֆրանսիայի հյուպատոսը եւ նշել, որ Ֆրանսիայի դեսպանատունը միակ դիվանագիտական ներկայացուցչությունը չէ Երեւանում, որտեղ ներդրվել է բիոմետրիկ պարամետրերի համակարգը: Նման համակարգ արդեն իսկ գործում է ՀՀ-ում Մեծ Բրիտանիայի, ԱՄՆ-ի ու Բուլղարիայի դեսպանատներում:



Ըստ Ժ.Շարոթի, նոր համակարգը լրացուցիչ դժվարություններ չի ստեղծի, նրա ներդրումը կօգնի պայքարել ապօրինի ներգաղթի դեմ: Ըստ հյուպատոսի տվյալների, միայն նախորդ տարի ապօրինի կերպով Հայաստանից Ֆրանսիա է արտագաղթել 1400 մարդ: