ԱՄՆ ազգային արխիվը հայ իրավապաշտպանին չի տրամադրել Հայոց ցեղասպանության մասին նյութերը

PanARMENIAN.Net - Սեպտեմբերի 23-ին ամերիկյան Կալիֆոռնիա նահանգի դաշնային դատարանում դատական նիստ է սկսվել ԱՄՆ Ազգային արխիվների վարչության (National Archives and Records Administration) դեմ հայցի հիման վրա, ըստ որի այդ վարչությունը իրավապաշտպան Վարդգես Եղիյանին չի տրամադրել Հայոց ցեղասպանությանն առնչվող նյութեր:



«Իմ կլիենտը մի քանի անգամ Վարչությանը դիմել է այդ փաստաթղթերն իրեն տրամադրելու խնդրանքով, բայց արխիվի աշխատակիցների կողմից ոչ արձագանք չի հետեւել: Այդ գործողությունները տեղեկատվության ազատության մասին Ակտի խախտում են հանդիսանում»,- հայտնել է Վարդգես Եղիյանի փաստաբան Մարկ Մակկարլին:



«20 օրվա ընթացքում Ազգային արխիվի աշխատակիցները պարտավոր էին ներկայացնել պահանջվող փաստաթղթերը, բայց չնայած բազմակի դիմումներին, իմ կլիենտն այդպես էլ պատասխան չստացավ: Մենք պարզապես ցանկանում ենք ստանալ այդ փաստաթղթերը»,- նշել է Մարկ Մակկարլին:



Վարդգես Եղիյանը ԱՄՆ-ում հաջողությամբ դատական գործեր է վարել Օսմանյան Թուրքիայում Հայոց ցեղասպանության ժամանակ իրենց ունեցվածքը կորցրած հայերի հետնորդներին փոխհատուցում հատկացնելու հարցում: Եղիյանի կարծիքով, նրան այդ փաստաթղթերը չեն տրամադրվել այն պատճառով, որ դրանցում հիշատակվում են Հայոց ցեղասպանության ուղղակի մասնակից երկրների անունները: «Այդ դատական գործընթացը վարում են Ամերիկայի այն հայերի անունից, որոնք փորձում են տեղեկատվություն գտնել այն մասին, թե ինչ է պատահել իրենց հարազատների հետ Հայոց ցեղասպանության ժամանակ»,- հայտնել է Վարդգես Եղիյանը, հաղորդում է Gibrahayer.com-ը: