ՔՈ. Ամուլսարը չպետք է հանք դառնա

PanARMENIAN.Net - «Քաղաքացու որոշում» կուսակցությունն, արձագանքելով վարչապետ Նիկոլ Փաշինյանի՝ ջերմուկցիներին ուղղված Ամուլսարի ճանապարհները բացելու կոչին, հայտարարել է, որ Ամուլսարը չպետք է հանքի վերածվի:

Նշվում է, որ կուսակցությունը դրա համար կներդնի առավելագույն ջանքերը

Հայտարարության մեջ ասված է. «2018 թվականի հեղափոխական գործընթացներից հետո Ամուլսարի հարցով մտահոգված քաղաքացիների կողմից կրկին ձևակերպվել է այդ հանքարդյունաբերական ծրագրի չեղարկման քաղաքական պահանջ։ Խնդիրն ունի տնտեսական, իրավական, սոցիալական, բնապահպանական և այլ բաղադրիչներ։ Ծավալվող քաղաքական գործընթացի սկզբում՝ վարչապետ Նիկոլ Փաշինյանը, անտեսելով խնդրի այլ բաղադրիչները, այն, անթույլատրելիության աստիճանի պարզեցնելով, հանգեցրել է միայն բնապահպանական խնդրի։ Դրա շրջանակներում նա առաջարկել է մի պարզ պայման՝ հանքը չի շահագործվի, եթե բնապահպանական ռիսկեր հայտնաբերվեն և կշագործվի, եթե այդպիսիք չհայտնաբերվեն։ Վերոնշյալ ռիսկերի հայտնաբերման գործը վստահվել էր կառավարության կողմից ընտրված «Էլարդ» կազմակերպության կողմից ներգրավված փորձագետներին։

Նույնիսկ առաջադրված պրիմիտիվ պայմանի տիրույթում պարզվել է, որ հանքի շահագործումն անթույլատրելի է։ «Էլարդ» ընկերության փորձագետները կառավարության կազմակերպած տեսակոնֆերանսի ընթացքում հօդս են ցնդեցրել հանքի շահագործման դեպքում բնապահպանական ռիսկերի կառավարելիության մասին մեզ պատմվող առասպելները։ Սակայն տեսակոնֆերանսին հաջորդած օրերի ընթացքում, որոշումների կայացման անհասկանալի տրամաբանությամբ, գործընթացը շարժվել է ի սկզբանե հռչակած պայմաններին հակառակ ուղղությամբ»։

Նշվում է, որ կառավարությունը, վարչապետի գլխավորությամբ, փորձում է լրացուցիչ «անհասկանալի և վիճահարույց փաստարկներով» հիմնավորել իր հռչակած սկզբունքից հրաժարվելու որոշումը․ կյանքն ապացուցել է, որ դա չի ներվում որևէ գործչի կամ քաղաքական ուժի։

«Խոսքի և գործի այսպիսի շեղումը կարող է հանգեցնել վստահության տոտալ ճգնաժամի։

Կրկին հավաստում ենք մեր դիրքորոշումն առ այն, որ Ամուլսարը չպետք է հանքի վերածվի և մենք դրա համար կներդնենք մեր առավելագույն ջանքերը։ Հաշվի առնելով մինչ այժմ հնչած բոլոր փաստարկները՝ պահանջում ենք․

- Ուժը կորցրած ճանաչել Ամուլսարի հանքի վերաբերյալ շրջակա միջավայրի վրա ազդեցության նախկին գնահատականը

- Վերանայել մետաղական հանքարդյունաբերության պետական քաղաքականությունը

- Վերանայել ընդերքի շահագործման վերաբերյալ օրենսդրական դաշտը»,-ասվում է ՔՈ հայտարարության մեջ։

Փաշինյանը սեպտեմբերի 9-ին իր ֆեյսբուքյան եթերում հայտարարել է, որ «առնվազն այս պահի դրությամբ չկա Ամուլսարի հանքի շահագործումը արգելելու որևէ իրավական հիմնավորում« և խնդրել է ջերմուկցիներին ապաշրջափակել Ամուլսարի հանք տանող բոլոր ճանապարհները։

Վարչապետն իր սեպտեմբերի 9-ի ուղերձում նշել է նաև, որ Ամուլսարի հարցում կան որոշակի ազդակներ, որ եթե իրավիճակը ճշգրիտ չկառավարվի, ապա դա կարող է հանգեցնել ՀՀ վականիշի վատթարացման: «Դրա հետևանքները կզգանք մասնավորապես վարկերի տրամադրման գործընթացում։ Եթե մենք ասում ենք, որ Ամուլսարի հանքը թույլ չենք տալիս շահագործել, ապա հարց է ծագում՝ բնապահպանակա՞ն մտավախություններից։ Եթե այո, ապա ծագում է երկրորդ հարցը. ինչո՞ւ ենք թույլ տալիս, որ Թեղուտը շահագործվի», - ասել է Փաշինյանը: