Պուտինը շնորհավորել է Լուկաշենկոյին

PanARMENIAN.Net - ՌԴ նախագահ Վլադիմիր Պուտինը շնորհավորել է Ալեքսանդր Լուկաշենկոյին Բելառուսի նախագահի պաշտոնում վերընտրվելու կապակցությամբ։ Այդ մասին հայտնում է Կրեմլի մամուլի ծառայությունը։

«Հուսով եմ, որ Ձեր պետական գործունեությունը կնպաստի ռուս-բելառուսական հարաբերությունների փոխշահավետ զարգացմանը բոլոր ոլորտներում, համագործակցության խորացմանը Միութենական պետության շրջանակում, ինտեգրման գործընթացների զարգացմանը ԵԱՏՄ և ԱՊՀ շրջանակում, ինչպես նաև ռազմաքաղաքական կապերի սերտացմանը ՀԱՊԿ-ում։ Դա, անշուշտ, բխում է ՌԴ և Բելառուսի եղբայրական ժողովրդների շահերից»,- ասվում է Պուտինի շնորհավորական հեռագրում։

Օգոստոսի 10-ի առավոտյան ԿԸՀ-ն հայտարարել է, որ գործող նախագահ Ալեքսանդր Լուկաշենկոն ընտրություններում հավաքել է ձայների 80.23%-ը, իսկ նրա հիմնական մրցակից Սվետլանա Տիխանովսկայան՝ 9.9%։

Օգոստոսի լույս 10-ի գիշերը Բելառուսում նախագահական ընտրություններից հետո Մինսկում և մյուս խոշոր քաղաքներում բողոքի ցույցերի առնվազն 140 մասնակից է ձերբակալվել։ Ուժայինների և ցուցարարների բախումները Մինսկի կենտրոնում շարունակվել են մինչև գիշերվա 3-ը, որից հետո ցուցարարները սկսել են ցրվել։Մինսկի, Բրեստի, Գրոդնոյի և այլ քաղաքների բնակիչները փողոց էին դուրս եկել այն բանից հետո, երբ ԿԸՀ-ն հայտարարել է գործող նախագահ Ալեքսանդր Լուկաշենկոյի հաղթանակի մասին այն ընտրատեղամասերում, որտեղ արդեն ամփոփվել էին արդյունքները։