Իրանի հայկական համայնքին չի սպառնում ոչնչացման վտանգը

PanARMENIAN.Net - Իրանի խորհրդարանի պատգամավոր Գեւորգ Վարդանյանը փետրվարի 15-ին ելույթ ունեցավ Իրանի հայկական համայնքի առջեւ: Ինչպես PanARMENIAN.Net ին հաղորդեցին ՀՅԴ կուսակցության կենտրոնական հանձնաժողովի` հասարակության հետ կապերի գրասենյակում, իր ելույթում Գեւորգ Վարդանյանը պատմեց Իրանի հայկական համայնքի դրության եւ հայ-իրանական հարաբերությունների զարգացման մասին: «Իրանի հայկական համայնքը վայելում է երկրի բնակչության սերն ու հարգանքը : Մենք մեր կողմից ջանքեր ենք գործադրում` ուղղված Իրանի հայերի իրավունքների պաշտպանությանը»,- ասաց Վարդանյանը:



Խոսելով Իրանից հայերի գաղթի մասին` պատգամավորը նշեց, որ վերջին տասնամյակների ընթացքում երկրից արտագաղթել է մոտ 50 000 հայ, որոնցից շատերը հաստատվել են Հայաստանում: «Իրանի ավելի քան 1500 հայեր ուսանում են Հայաստանի համալսարաններում: Նման հանգամանքներում Իրանի հայկական համայնքին, որը կազմում է մոտ 100 հազար մարդ, ոչնչացման վտանգ չի սպառնում»,- ընդգծեց պատգամավորը: Խոսելով հայ-իրանական հարաբերությունների մասին` Գեւորգ Վարդանյանը նշեց հայկական համայնքի կարեւոր դերը Երեւանի եւ Թեհրանի միջեւ հարաբերությունների ամրապնդման եւ ընդլայնման գործում: