Պուտինն ու Մակրոնը պատրաստակամ են շարունակել ջանքերի համակարգումը ԼՂ հարցով ԵԱՀԿ ՄԽ շրջանակում

PanARMENIAN.Net - ՌԴ և Ֆրանսիայի նախագահներ Վլադիմիր Պուտինն ու Էմանուել Մակրոնը դետեմբերի 22-ին հեռախոսազրույցի ընթացքում քննարկել են Լեռնային Ղարաբաղի շուրջ ստեղծված իրավիճակը և հաստատել տարածաշրջանում կարգավորման տարբեր ասպետկների շուրջ համակարգումը շարունակելու փոխադարձ պատրաստակամությունը։ Այդ մասին տեղեկացնում է Կրեմլի մամուլի ծառայությունը։

«ՌԴ նախագահը նշել է, որ իրավիճակը տարածաշրջանում կայունանում է, իսկ նոյեմբերի 10-ի եռակողմ հայտարարության մեջ արձանագրված պայմանավորվածությոններն ընդհանուր առմամբ հետևողականորեն կատարվում են։ Նշվել է ռուս խաղաղապահների հաջող աշխատանքը, որոնք Բաքվի և Երևանի խնդրանքով ապահովում են հրադադարի պահպանումն ու քաղաքացիական բնակչության անվտանգությունը։ Կողմերը հաստատել են ԼՂ կարգավորման տարբեր ասպեկտներում համակարգումը շարունակելու պատրաստակամությունը, մասնավորապես, ԵԱՀԿ Մինսկի խմբի շրջանակում»,-ասվում է հաղորդագրության մեջ։

Նշվում է, որ հատկապես ակտուալ են համարվել փախստականների վերադարձի, ենթակառուցվածքների վերականգնման հետ կապված հումանիտար հարցերը, կրոնական և մշակութային հուշարձանների պահպանումը, մասնավորապես, Հումանիտար արձագանքման միջազգային կենտրոնի գծով։

Սեպտեմբերի 27-ից Արցախի դեմ Ադրբեջանը պատերազմ էր սանձազերծել՝ ահաբեկիչ-վարձկանների ու թուրքերի անմիջական աջակցությամբ։ Նոյեմբերի 10-ին վարչապետ Նիկոլ Փաշինյանը հայտարարեց, որ ՌԴ ու Ադրբեջանի նախագահների հետ պատերազմի դադարեցման համաձայնության է եկել։ Ըստ դրա՝ Ադրբեջանը և Հայաստանը կանգ առան իրենց զբաղեցրած դիրքերում: Իսկ ՌԴ խաղաղապահները տեղակայվեցին ԼՂ շփման գծի երկայնքում և Հայաստանի հետ կապող միջանցքում: Պատերազմի ընթացքում հայկական կողմը տարածքային կորուստներ ունեցավ որոշ ուղղություններով, այդ թվում կորցրեց Շուշին։ Բացի այդ, ըստ եռակողմ հայտարարության, հայկական կողմը հետ քաշեց զորքերը Աղդամից, Քարվաճառից և Լաչինից։