Հայաստանի հավաքականի մարզիչ. Խաղում էինք մենք, իսկ հաղթեցին էստոնացիները

PanARMENIAN.Net - Հայաստանի ֆուտբոլի հավաքականի գլխավոր մարզիչ Վարդան Մինասյանը, մեկնաբանելով Էստոնիա-Հայաստան խաղի արդյունքները, հայտարարել է, որ 1:0 հաշիվը «չէր համապատասխանում խաղին, քանի որ Հայաստանի հավաքականն ավելի արժանի էր հաղթնակի»:



«Խաղում էինք մենք, իսկ հաղթեցին էստոնացիները: Անկասկած, հիասթափվում ես, երբ լուրջ վտանգավոր պահեր ես ստեղծում, իսկ մրցակիցդ օգտագործում է փոքրաթիվ շանսերից մեկը: Ֆուտբոլում միշտ չէ, որ հաշիվը համապատասխանում է խաղին: Ցանկացած դեպքում, մենք շատ ավելի լավ հանդես եկանք, քան Երեւանում: Խաղից հետո ես շնորհակալություն հայտնեցի հավաքականի բոլոր ֆուտբոլիստներին նվիրվածության եւ ջանքերի համար: Նշեմ, որ Տալլինի մարզադաշտն ահավոր վիճակում էր: Դա չի արդարացնում խաղի արդյունքը: Ես ուղղակի փաստ են արձանագրում»,-մեջբերում է Մինասյանին ՀՖՖ-ի պաշտոնական կայքէջը:



Մինասյանը նաեւ ասել է, որ այս մրցաշարում արդեն կարեւոր չէ, թե որ տեղը կզբաղեցնի Հայաստանի հավաքականը, կարեւոր է, որ թիմը լավ խաղ ցույց տա առաջիկայում:



«Դեռեւս հստակ չգիտեմ, թե որքան ժամանակ կկատարեմ գլխավոր մարզչի պարտականությունները: Այսօր ես կազմակերպչական դժվարություններ չունեցա, քանի որ աշխատում եմ հավաքականում արդեն 4 տարի եւ լավ գիտեմ ֆուտբոլիստներին: Գիտեմ նաեւ, որ սա մեծ պատասխանատվություն է: Ուստի առաջիկա խաղերում կաշխատենք առավելագույն լավ խաղ ցույց տալ»,-ասել է Մինասյանը: