BigStory հիմնադրամը $250,000-ի ներդրում է արել հայաստանյան Docus-ում

20 հունիսի 2022 - 18:29 AMT

PanARMENIAN.Net - BigStory վենչուրային հիմնադրամը $250,000-ի ներդրում է կատարել հայաստանյան Docus ընկերությունում, որը հեղափոխական մոտեցում է որդեգրել՝ Եվրոպայի և ԱՄՆ-ի լավագույն բժիշկներին տելեբժշկության հարթակով կապելով տեղական հիվանդանոցների հետ: Այդ մասին ֆեյսբուքյան իր էջում տեղեկացրել է համահիմնադիր Արտավազդ Մինասյանը։

«Շատերս եղել ենք այն իրավիճակում, երբ մեր հարազատի կամ ընկերոջ մոտ ախտորոշվել է ծանր հիվանդություն, և մենք կարիք ունենք երկրորդ կարծիքի:

Հաջորդ քայլում ծանոթների միջոցով դիմում ենք Գերմանիայի, կամ ԱՄՆ-ի տվյալ բժշկական մասնագիտությամբ աշխատող մեր հասանելի «լավագույն» մասնագետին:

Շուտով գալիս է երկրորդ կարծիքը, որը մեր տեղական բուժող բժիշկը դժկամությամբ է ընդունում, քանի որ այն ոչ մի իրավական հիմք չունի»,-ասվում է գրառման մեջ:

Docus ընկերությունը հիմնել են Ռոբերտ Սարգսյանը և Գևորգ Նազարյանը, որոնք թողել են իրենց Մոսկվայի շահութաբեր բիզնեսը և տեղափոխվել Հայաստան։

«Docus-ն առաջարկում է հեղափոխական նոր մոտեցում՝ Եվրոպայի և ԱՄՆ-ի լավագույն բժիշկներին տելեբժշկության պլատֆորմայով կապում է զարգացող երկրների հիվանդանոցների հետ:

Տեղական հիվանդանոցում աշխատող մասնագետը և նրա եվրոպացի գործընկերը կազմում են բժշկական խորհուրդ՝ այսպիսով զարգացող երկրում ապրող հիվանդին հասանելի դարձնելով լավագույն բժշկական գիտելիքը:

Ուրախ ենք հայտարարել BigStory-ի վեցերորդ $250K ներդրումը Docus ընկերությունում»,-ասվում է գրառման մեջ: