Լավրովը մեկնել է Իրան. Անմիջապես հետո Ադրբեջան կայցելի

PanARMENIAN.Net - Հունիսի 22-ին մեկնարկել է ՌԴ ԱԳ նախարար Սերգեյ Լավրովի աշխատանքային այցն Իրան, որը կավարտվի հունիսի 23-ին։ Այցը տեղի է ունենում Իրանի ԱԳ նախարար Հոսեյն Ամիր Աբդոլլահիանի հրավերով։ Այդ մասին ճեպազրույցում հայտնել է ՌԴ ԱԳՆ պաշտոնական ներկայացուցիչ Մարիա Զախարովան։

Կողմերը քննարկելու են մի շարք միջազգային հարցեր, այդ թվում իրավիճակն Իրանի միջուկային ծրագրի շուրջ, Ուկրաինայում, Սիրիայում, Աֆղանստանում, Հարավային Կովկասում, Եմենում և Կասպից ծովի շուրջ։

‌Քննարկվելու են նաև երկկողմ հարցեր։

Հունիսի 23-24-ին տեղի կունենա Լավրովի այցն Ադրբեջան՝ բանակցություններ կանցկացվեն ԱԳ նախարար Ջեյհուն Բայրամովի և նախագահ Իլհամ Ալիևի հետ։

Հատուկ ուշադրություն է դարձվելու 2020թ․ նոյեմբերի 9-ի, 2021թ․ հունվարի 11-ի և նոյեմբերի 26-ի եռակողմ պայմանավորվածությունների իրականացման ընթացքին, որոնք կոչված են «կարգավորելու հայ-ադրբեջանական հարաբերություններն ու վերածելու Հարավային Կովկասը խաղաղության, կայունության և բարգավաճման գոտու»։

Քննարկվելու են երկկողմ հարաբերությունների բոլոր հարցերը՝ ըստ փետրվարի 22-ին երկու երկրների ղեկավարների կողմից Մոսկվայում ստորագրված Դաշնակցային փոխգործակցության մասին հռչակագրի։

Քննարկվելու են նաև մի շարք տարածաշրջանային և միջազգային հարցեր։