Բաքուն, մեկնաբանելով հայ-թուրքական հարաբերությունները, սահմանափակվում է ընդհանուր արտահայտություններով

PanARMENIAN.Net - Ադրբեջանը մեկնաբանում է Թուրքիայի եւ Հայաստանի միջեւ կապերի կարգավորման վերաբերյալ շրջանակային համաձայնության մասին հայտարարությունները:



«Հայաստանի եւ Թուրքիայի միջեւ հարաբերությունների հաստատման գործընթացը «պետք է ընթանա Ադրբեջանի տարածքից հայկական զինված ուժերի դուրս բերման հարցին զուգահեռ», հայտարարել է Ադրբեջանի ԱԳՆ մամլո քարտուղար Էլհան Պոլուխովը` մեկնաբանելով Թուրքիայի ԱԳՆ հայտարարությունը Հայաստանի հետ կապերի կարգավորման վերաբերյալ շրջանակային համաձայնություն կնքելու մասին:



«Մեր դիրքորոշումն այս հարցում անփոփոխ է: Դա յուրաքանչյուր պետության ինքնիշխան իրավունքն է: Այնուամենայնիվ Ադրբեջանը համարում է, որ Հայաստանի եւ Թուրքիայի միջեւ հարաբերությունների հաստատման գործընթացը «պետք է ընթանա Ադրբեջանի տարածքից հայկական զինված ուժերի դուրս բերման հարցի լուծման հետ զուգահեռ»,-ասել է նա, հաղորդում է Day.az-ը:



2009 թվականի ապրիլի 22-ին Հայաստանը եւ Թուրքիան, Շվեյցարիայի միջնորդությամբ, ինտենսիվ աշխատանք են տարել, նպատակ ունենալով կարգավորել իրենց երկկողմ հարաբերությունները եւ զարգացնել դրանք փոխադարձ հարգանքի ու բարիդրացիության ոգով` այսպիսով խթանելով խաղաղությունը, կայունությունը եւ անվտանգությունը ողջ տարածաշրջանում: Այդ մասին ասվում է Հայաստանի Հանրապետության, Թուրքիայի Հանրապետության արտգործնախարարությունների եւ Շվեյցարիայի արտաքին գործերի դաշնային դեպարտամենտի համատեղ հայտարարության մեջ:



Այդ գործընթացում երկու կողմերը ձեռք են բերել շոշափելի առաջընթաց եւ փոխըմբռնում: Նրանք համաձայնության են հանգել իրենց երկկողմ հարաբերությունների կարգավորման համապարփակ շրջանակի շուրջ երկու կողմերին գոհացնող կերպով: Այս համատեքստում սահմանվել է ճանապարհային քարտեզ: Այս համաձայնեցված հիմքերը դրական հեռանկար են ստեղծում գործընթացի շարունակման համար, հաղորդում է ՀՀ ԱԳՆ-ն: