Սահակյան․ Վարդանյանը հրաժարվել է պետպաշտպանի ծառայություններից, քանի որ չի վստահում նրան

PanARMENIAN.Net - Արցախի նախկին պետնախարար Ռուբեն Վարդանյանը Բաքվում ընթացող շինծու դատավարության փետրվարի 13–ի նիստում հրաժարվել պետական պաշտպանից, քանի որ չի վստահում նրան։ Այդ մասին ասել է ՄԻԵԴ-ում հայ գերիների շահերի պաշտպան, փաստաբան Սիրանուշ Սահակյանը, տեղեկացնում է News.am-ը։

«Ռուբեն Վարդանյանը հրաժարվել է պետության կողմից նշանակված՝ պետական պաշտպանի ծառայություններից, որին դատախազը ներկայացրել էր առաջին նիստում` պատճառաբանելով, թե իբր ելնելով գործի բարդությունից, Վարդանյանին անհրաժեշտ է ևս մեկ պաշտպան։ Վարդանյանը հայտարարել էր, որ այդ փաստաբանն իրեն ոչ մի իրավական օգնություն չի ցուցաբերել, երբևէ չի այցելել մեկուսարան և ինքը նրան չի վստահում:

Այդ ժամանակ մեղադրող կողմն առարկել էր՝ պնդելով, որ պետության կողմից նշանակված փաստաբանը պետք է մնա։ Սակայն, իմ տեղեկություններով, երեկվա նիստում պետական պաշտպանից հրաժարվելու՝ Վարդանյանի միջնորդությունը բավարարվել է: Վարդանյանի շահերն այնտեղ պաշտպանելու է Ադրբեջանում լիցենզավորված նրա մասնավոր փաստաբանը՝ Աբրահամ Բերմանը: Իսկ միջազգային փաստաբանի՝ Ջարեդ Գենսերի հետ տեսակցելու և նրա իրավաբանական օգնությունն ստանալու հնարավորությունից նա զրկված է, քանի որ Ադրբեջանի դատախազությունը մերժել էր Գենսերի՝ Բաքու այցելելու դիմումը»,–ասել է նա։

Անդրադառնալով Վարդանյանին ներկայացված անհավանական են ու զավեշտալի մեղադրանքներին՝ Սահակյանն ասել է, որ «ներկայացված մեղադրանքները դուրս են ողջամտության սահմաններից, ուստի անհնար է դրանք մեկնաբանել կամ հակափաստարկներ բերել դրանց»։

Բաքուն Ռուբեն Վարդանյանին մեղադրել է ադրբեջանցի դիվանագետների դեմ «Նեմեզիս–2» կազմակերպելու մեջ։ Նրան մեղադրում են նաև «2022 թվականի սեպտեմբերին Ադրբեջանի սահմանն ապօրինի հատելու, «Ավրորա» հիմնադրամի և այլ կառույցների միջոցով զինված խմբավորումների ֆինանսավորման, զենքի մատակարարման և պահեստավորման մեջ: Բացի այդ, ըստ մեղադրանքի, Վարդանյանն, իբր, «վճարել է ապօրինի զինված խմբավորումների անդամներին, համագործակցել ՈՄԱ կազմակերպության ղեկավար Վլադիմիր Վարդանովի հետ՝ զինյալների պատրաստման նպատակով»։

Բացի այդ, հայտարարվել է, թե Վարդանյանը նախաձեռնել է «բանակցություններ ուղղաթիռային տիպի անօդաչու թռչող սարքերի ձեռքբերման շուրջ՝ ապօրինի զինված խմբավորումների համար, ինչպես նաև դրանց արտադրության գործարանի կառուցման ուղղությամբ»։ Նրան մեղադրում են նաև ռադիոէլեկտրոնային պատերազմի համակարգերի մատակարարման կազմակերպման մեջ։