Ստամբուլի քաղաքապետը մեղադրում է Էրդողանին իրեն քաղաքականությունից հեռացնելու մտադրության մեջ

PanARMENIAN.Net - Ստամբուլի քաղաքապետ Էքրեմ Իմամօղլուն մեղադրել է Թուրքիայի նախագահ Ռեջեփ Թայիփ Էրդողանին իրեն քաղաքական ասպարեզից դուրս մղելու նպատակով դատական քայլեր ձեռնարկելու մեջ՝ կոչ անելով նրան արդար մրցակցության։ Նրա այս հայտարարությունը հաջորդել է դատախազների կողմից իր դեմ նոր մեղադրանքի ներկայացմանը։

Վերջին գործը կարող է հանգեցնել մինչև չորս տարվա ազատազրկման և քաղաքական գործունեության արգելքի, ինչը բխում է նրա քննադատությունից՝ ուղղված դատարանի նշանակած փորձագետին, որին նա մեղադրել է կողմնակալ լինելու մեջ, հայտնում է Turkish Minute-ը։

Որպես ընդդիմադիր Հանրապետական ժողովրդական կուսակցության (CHP) առանցքային գործիչ՝ Իմամօղլուն 2019 թվականի քաղաքապետական ընտրություններում հաղթանակի հասավ՝ վերջ դնելով Էրդողանի իշխող Արդարություն և զարգացում կուսակցության (AKP) երկարամյա գերակայությանը Ստամբուլում։ Այդ պահից ի վեր նա բազմիցս ենթարկվել է դատական հետապնդումների։

X սոցիալական հարթակում Իմամօղլուն նշել է, որ սա արդեն հինգերորդ դեպքն է, երբ նա բախվում է քաղաքական արգելքի սպառնալիքին, ընդ որում՝ նրան սպառնում է 25 տարուց ավելի ազատազրկում։

«Այն անձը, ով փորձում է ինձ հեռացնել քաղաքականությունից, ակնհայտ է՝ դա պարոն նախագահն է», – գրել է Իմամօղլուն, ով համարվում է Էրդողանի գլխավոր մրցակիցներից մեկը հնարավոր նախագահական ընտրություններում։

«Ես կոչ եմ անում նախագահին լինել ազնիվ։ Այս ժողովուրդը սիրում է խիզախ և պատվարժան մարդկանց»,–գրել է նա։

Էրդողանը, սակայն, հերքել է իր առնչությունն Իմամօղլուի դեմ դատական գործերին։ Անցած ուրբաթ լրագրողների հետ զրույցում նա նշել է․ «Ինձ չի հետաքրքրում, եթե որևէ մեկին քաղաքական արգելք են սահմանում»։

Էրդողանի հաղորդակցության տնօրեն Ֆահրեթթին Ալթունը նույնպես հերքել է Իմամօղլուի պնդումները՝ դրանք որակելով որպես «մեծ զրպարտություն» և «դատական գործընթացները խոչընդոտելու փորձ»։

Վերջին մեղադրանքում Իմամօղլուն մեղադրվում է «դատական պաշտոնյայի, փորձագետի կամ վկայի վրա ազդելու» մեջ։ Գործը կապված է հունվարի վերջին կայացած մամուլի ասուլիսի հետ, որի ընթացքում Իմամօղլուն հայտարարել էր, որ փորձագետ Սաթլմիշ Բյույքջանայաքին հատուկ ընտրվել է CHP-ի քաղաքապետների դեմ կողմնակալ զեկույցներ կազմելու նպատակով։ Նրա մեկնաբանությունները հնչել են ընդդիմադիր գործիչների դեմ իրավական ճնշումների ֆոնին, որի հետևանքով վերջին ամիսներին ձերբակալվել և պաշտոնից հեռացվել են մի շարք քաղաքապետներ։

Ստամբուլի գլխավոր դատախազությունը մամուլի ասուլիսից անմիջապես հետո հետաքննություն է սկսել՝ Իմամօղլուին մեղադրելով «դատական պաշտոնյայի, փորձագետի կամ վկայի վրա ազդելու» և «արդար դատավարությանը միջամտելու» մեջ։

Բացի այդ, դատախազությունը մեղադրանք է առաջադրել ընդդիմադիր Halk TV հեռուստաընկերության հինգ լրագրողների, որոնցից մեկը գտնվում է կալանքի տակ։ Նրանք մեղադրվում են Բյույքջանայաքին առանց թույլտվության հարցազրույց տալու և նրա ինքնությունը բացահայտելու մեջ՝ վտանգելով նրա անվտանգությունը և ազդելով դատական գործընթացի վրա։

Իմամօղլուն արդեն պայքարում է մի շարք այլ իրավական գործերի դեմ։ 2022 թվականի դեկտեմբերին նա դատապարտվել է ավելի քան երկու տարվա ազատազրկման և զրկվել քաղաքական գործունեությունից՝ Թուրքիայում բարձրագույն ընտրական մարմնի անդամներին ենթադրաբար վիրավորելու համար։ Եթե վերաքննիչ դատարանը հաստատի այս որոշումը, նա պաշտոնապես կզրկվի քաղաքական իրավունքներից։