«Բաբոն Տերա» նախաձեռնությունը կոչ է անում ՄԱԿ-ին բարձրաձայնել հայ ռազմագերիների հարցը

PanARMENIAN.Net - «Բաբոն Տերա» կանանց նախաձեռնությունը բաց նամակ է հղել ՄԱԿ-ի գլխավոր քարտուղարի մարդու իրավունքների գծով օգնական Իլզե Բրանդս Քեհրիսին, ինչպես նաև Եվրախորհրդարանի պատգամավոր Մարտա Թեմիդոյին և Եվրոպական խորհրդարանի նախագահ Ռոբերտա Մեցոլային։

Նամակում նշվում է․ «Հազարավոր հայ կանանց անունից այս նամակն ենք ուղղում Ձեզ։ Շնորհավորում ենք Կանանց միջազգային օրվա՝ մարտի 8-ի կապակցությամբ։ Ձեր ձեռքբերումներն ու ներդրումները մարդու իրավունքների պաշտպանության ոլորտում, մասնավորապես՝ որպես ՄԱԿ-ի գլխավոր քարտուղարի մարդու իրավունքների օգնականի դերում, խոսում են ձեր նվիրվածության և բացառիկ առաջնորդական որակների մասին:

Ամբղջ աշխարհում կանանց տոների այս նշանակալից առիթով մենք դիմում ենք ձեզ՝ վստահ լինելով, որ որպես կին առաջնորդ և գտնվելով մարդու իրավունքների պաշտպան ՄԱԿ-ի ամենաբարձր մակարդակում, դուք կարող եք կարևոր դեր խաղալ հայ բանտարկյալների ճակատագրում: Այսօր, մինչ աշխարհը հարգում է կանանց իրավունքներն ու ձեռքբերումները, հարյուրավոր հայ մայրեր, կանայք, քույրեր և դուստրեր չեն կարող տոնել: Նրանք սպասում են Ադրբեջանում գերության մեջ գտնվող իրենց սիրելիների վերադարձին։

Մենք խնդրում ենք ձեր աջակցությունն ու գործողությունը։ Որպես ՄԱԿ-ի գլխավոր քարտուղարի՝ մարդու իրավունքների գծով օգնական, դուք ունեք բացառիկ հնարավորություն և լծակներ՝ ազդելու այս իրավիճակի վրա: Ձեր ձայնը, ուշադրությունը և կոնկրետ քայլերը կարող են կյանքեր փրկել և վերամիավորել ընտանիքները:

Մենք կոչ ենք անում ձեզ.

1. Հայ բանտարկյալների հարցը բարձրացնել ՄԱԿ-ի ֆորումներում, այդ թվում՝ Մարդու իրավունքների խորհրդում և Անվտանգության խորհրդում.
2. Աջակցել ՄԱԿ-ի գլխավորած միջազգային դիտորդական առաքելություններին այցելել ադրբեջանական բանտեր, որտեղ պահվում են հայ բանտարկյալները
3. Խրախուսել Ադրբեջանում մարդու իրավունքների խախտումների դեմ պատասխանատվության միջոցները
4. Օգտագործեք ձեր դիրքը բանակցություններին նպաստելու և բոլոր բանտարկյալների անհապաղ վերադարձն ապահովելու համար:

Մենք բառեր կամ վերացական արտահայտություններ չենք խնդրում: Կոնկրետ գործողություններ ենք խնդրում։ Այս տարի տոնելու փոխարեն ընտրել ենք մեր ձայնը բարձրացնելը. Կոչ ենք անում միանալ մեզ այս կարևոր պայքարում։ Մեր բանտարկյալների կյանքը հաշվում են ոչ թե օրերով, այլ րոպեներով։ Խնդրում ենք գործել հիմա»։

ՀՀ ԱԳՆ–ն հայտարարություն է տարածել՝ ընդգծել է, որ շարունակում է միջազգային գործընկերների ուշադրությունը հրավիրել Ադրբեջանում պահվող հայ ռազմագերիների, պատանդների և այլ կալանավորված անձանց ազատ արձակման խնդրի, ինչպես նաև դատավարական կոպտագույն խախտումներով և խոշտանգման աղաղակող նշաններով նրանց մի մասի նկատմամբ ընթացող բեմականացված դատավարությունների վրա:

Իրավապաշտպան Սիրանուշ Սահակյանը հայտարարել է, որ Արցախի նախկին պետնախարար Ռուբեն Վարդանյանի լուսանկարները վկայում են մարմնի տեսանելի հատվածներում առկա վնասվածքների մասին։ Արդեն մեկ շաբվաթ է Վարդանյանը հացադուլի մեջ է։ Վերջին դատական նիստում Վարդանյանի ինքնազգացողությունը կտրուկ վատացել էր, իսկ դատական նիստի ընթացքում արված լուսանկարներում տեսանելի էին նրա դեմքին առկա վնասվածքները։ Չնայած դրան՝ դատարանը ստիպել է նրան մասնակցել նիստին։ Վարդանյանի միջազգային փաստաբանը նախօրեին մանրամասներ էր ներկայացրել նրա առողջական վիճակի մասին՝ նշելով, որ կյանքին լուրջ վտանգ է սպառնում։