ԱՄՆ-ից միջազգային սուրհանդակային առաքանիում հայտնաբերվել է 970 գրամ մարիխուանա

2 մայիսի 2025 - 16:52 AMT

PanARMENIAN.Net - ԱՄՆ-ից Հայաստան ուղարկված միջազգային սուրհանդակային առաքանիների զննման ընթացքում հայտնաբերվել է մոտ մեկ կիլոգրամ «մարիխուանա» տեսակի թմրամիջոց, որի առնչությամբ ձերբակալվել է 3 ՀՀ քաղաքացի։

Պետական եկամուտների կոմիտեի մաքսանենգության դեմ պայքարի վարչության և Էլեկտրոնային առևտրի ու օդային տրանսպորտով իրականացվող փոխադրումների վարչության աշխատակիցները մաքսային հսկողություն են իրականացրել «ՕՆԷՔՍ» ընկերության ժամանակավոր պահպանման պահեստում՝ զննելով ԱՄՆ-ից Հայաստան ուղարկված սուրհանդակային առաքանին։

Bացի անձնական օգտագործման իրերից և հագուստից, փաթեթում հայտնաբերվել է 970 գրամ քաշով «մարիխուանա» տեսակի թմրամիջոց։

Մաքսանենգության դեմ պայքարի վարչության օպերատիվ հետախուզության բաժնի աշխատակիցների կողմից իրականացված անհետաձգելի միջոցառումներով պարզվել է, որ առաքանու հասցեատերը պատրաստվում է այն վերցնել «ՕՆԷՔՍ»-ի պահոցից, որը անմիջապես վերցվել է շուրջօրյա հսկողության տակ։

Արդյունքում, «Երևանի մաթեմատիկական մեքենաների գիտահետազոտական ինստիտուտ» մասնաշենքից մաքսանենգության անմիջական կասկածանքով ձերբակալվել է ՀՀ քաղաքացի Ա.Ա.-ն։ Նա ենթարկվել է անձնական խուզարկության և տեղափոխվել ՊԵԿ մաքսանենգության դեմ պայքարի վարչություն, այնուհետև՝ Քննչական կոմիտեի տնտեսական հանցագործությունների և մաքսանենգությունների քննության գլխավոր վարչություն, որտեղ քրեական վարույթի շրջանակում նա ձերբակալվել է։

Հետագա գործողությունների արդյունքում պարզվել է, որ նշված թմրամիջոցը նախատեսված է եղել վաճառքի՝ տելեգրամյան հարթակի միջոցով։ Ձեռք բերված օպերատիվ տվյալների համաձայն՝ նշված թմրամիջոցները պետք է վերցնեին Վանաձոր-Ստեփանավան թունելի հարակից հատվածից։

Տվյալ վայրում իրականացված դարանակալման արդյունքում պարզվել է այն անձանց ինքնությունը, ովքեր նախատեսել են ձեռք բերել թմրամիջոցը։ Գործողություններին ներգրավվել են նաև ՀՀ ներքին գործերի նախարարության ոստիկանության պարեկային ծառայության աշխատակիցները։

Նրանց աջակցությամբ Ստեփանավան քաղաքի հասցեներից մեկում մարիխուանա ձեռք բերելու և իրացնելու անմիջական կասկածով ձերբակալվել են ևս երկու ՀՀ քաղաքացի։ Նրանք ենթարկվել են անձնական խուզարկության և տեղափոխվել ՊԵԿ մաքսանենգության դեմ պայքարի վարչություն, ապա՝ Քննչական կոմիտեի տնտեսական հանցագործությունների և մաքսանենգությունների քննության գլխավոր վարչություն, որտեղ արդեն ձերբակալվել են՝ նախաձեռնված քրեական վարույթի շրջանակում։

Ներկայում ՊԵԿ մաքսանենգության դեմ պայքարի վարչության աշխատակիցները շարունակում են օպերատիվ-հետախուզական միջոցառումները՝ պարզելու այս գործով հնարավոր այլ մասնակիցների ինքնությունը։

Ծանուցում. հանցագործության համար մեղադրվողը համարվում է անմեղ, քանի դեռ նրա մեղավորությունը դատարանի օրինական ուժի մեջ մտած դատավճռով ապացուցված չէ՝ ՀՀ քրեական դատավարության օրենսգրքով սահմանված կարգով։