Ներհիվանդանոցային վարակների 40-80%-ը փոխանցվում է ձեռքերի միջոցով

5 մայիսի 2025 - 16:47 AMT

PanARMENIAN.Net - Ամբողջ աշխարհում տարեկան գրանցվում է ներհիվանդանոցային վարակների մոտ 14 միլիոն դեպք, որոնց զգալի մասը՝ 40-80 տոկոսը, փոխանցվում է ձեռքերի միջոցով։

Մայիսի 5-ը 2008 թվականից նշվում է որպես Ձեռքերի հիգիենայի համաշխարհային օր։ 5․5 ամսաթիվն ընտրվել է խորհրդանշական հիմքով՝ կապված մարդու յուրաքանչյուր ձեռքի հինգ մատի հետ։ ՄԱԿ-ի գլխավոր ասամբլեան որոշում է կայացրել այս օրը սահմանել՝ համագործակցելով ՅՈՒՆԻՍԵՖ-ի մանկական հիմնադրամի և Առողջապահության համաշխարհային կազմակերպության հետ։

Այս տարվա արշավը կրում է «Դա կարող է լինել ձեռնոցը, բայց ձեռքերի հիգիենան մշտապես պարտադիր է» կարգախոսը, հայտնում է Երևանի պետական բժշկական համալսարանի առողջապահական ծրագրերի ազգային գիտահետազոտական «Հերացի» կենտրոնը։

Անկախ ձեռնոցների առկայությունից, ձեռքերի հիգիենայի պահպանումը ճիշտ պահին և համապատասխան եղանակով շարունակում է մնալ առողջապահական համակարգի աշխատողների և խնամք ստացողների պաշտպանության առաջնային գործիքը։

Բժշկական ոլորտում օգտագործվող ձեռնոցները համարվում են միանգամյա օգտագործման միջոցներ, որոնք նախատեսված են բուժական միջամտությունների ժամանակ կիրառվելու համար։ Սակայն դրանք կարող են նույնքան հեշտությամբ աղտոտվել, որքան մերկ ձեռքը և չեն երաշխավորում լիարժեք պաշտպանություն։ Ձեռնոցները հարկավոր է հանել անմիջապես պացիենտի հետ շփումից հետո, որից անմիջապես հետո պետք է իրականացնել ձեռքերի հիգիենա՝ ըստ ԱՀԿ-ի «Ձեռքի հիգիենայի 5 պահերը» ուղեցույցի։

Այդ «5 պահերը», որոնք հատուկ նշանակություն ունեն, ներառում են հետևյալը․

պացիենտին դիպչելուց առաջ,
մաքուր և ասեպտիկ գործողություններից առաջ,
կենսաբանական հեղուկների հետ շփումից հետո,
պացիենտին դիպչելուց հետո,
պացիենտի շրջապատի առարկաներին դիպչելուց հետո։

Հաշվի առնելով գրիպի նոր տեսակների և COVID-19 համավարակի տարածումը՝ ձեռքերի լվացման կարևորությունը պահպանվել է որպես հիմնական կանխարգելիչ միջոցներից մեկը։

Ձեռքերի ճիշտ և ժամանակին հիգիենիկ մշակումը դիտարկվել է որպես պացիենտների և բուժաշխատողների անվտանգության երաշխիք։