Սարիկ Անդրեասյանը կնկարահանի «Պատերազմ և խաղաղությունը»

PanARMENIAN.Net - Ռուսաստանաբնակ ռեժիսոր Սարիկ Անդրեասյանը հայտարարել է, որ պատրաստվում է Լև Տոլստոյի «Պատերազմ և խաղաղություն» վեպի հերթական էկրանավորումը, որի աշխատանքները կմեկնարկեն աշնանը։

Ներկայում իրականացվում են դերասանական լսումներ, որոնց ընթացքում որոշվելու են գլխավոր դերակատարները, գրում է Gazeta.ru-ն։

«Պատրաստվում ենք «Պատերազմ և խաղաղության» նկարահանումներին։ Մեկնարկել է գլխավոր դերակատարների ընտրությունը։ Բոլոր գաղտնիքները չենք կարող բացահայտել, սակայն նկարահանումները կսկսվեն աշնանը», – գրել է Անդրեասյանն իր կնոջ՝ դերասանուհի Լիզա Մորյակի հետ համատեղ Telegram ալիքում՝ «Սարիկ և Մորյակ»։

Լիզա Մորյակը նշել է, որ Նատաշա Ռոստովայի դերը վստահվելու է մի երիտասարդ, սակայն արդեն չափահաս դերասանուհու։ Նա ընդգծել է, որ սա պայմանավորված է գրքի բովանդակությամբ, ըստ որի՝ Նատաշան 13 տարեկան էր, երբ հանդիպել է Բոլկոնսկուն։

Անդրեասյանն ավարտին է հասցրել «Պրոստոկվաշինո» ֆիլմի նկարահանումները, որը կցուցադրվի 2026–ի հունվարին։ 2024–ի մարտին էկրան է բարձրացել մեկ այլ ռուս դասականի՝ Ալեքսանդր Պուշկինի «Օնեգին» պոեմի էկրանավորումը։