Ամստերդամում բացվել է Գրիգոր Նարեկացու հիշատակը հավերժացնող հուշատախտակը

PanARMENIAN.Net - Մայիսի 10-ին, Ամստերդամի պատմական կենտրոնում գտնվող Սուրբ Նիկողայոսի տաճարում հանդիսավոր արարողությամբ բացվել է հայ անվանի աստվածաբանի, բանաստեղծի և մտածողի՝ Սուրբ Գրիգոր Նարեկացու բարձրաքանդակ հուշատախտակը։ Միջոցառմանը ներկա են գտնվել Սուրբ Հոգի հայ առաքելական եկեղեցու համայնքի ներկայացուցիչները, տարբեր քրիստոնեական եկեղեցիների առաջնորդներ, ինչպես նաև քաղաքի հոգևոր և մշակութային ոլորտի նշանավոր գործիչներ, հայտնում է Արմենպրեսը։

«Նիդեռլանդական օրագիր»-ը հայտնել է, որ էկումենիկ այս միջոցառման ընթացքում հնչել են Հաառլեմ-Ամստերդամի կաթոլիկ թեմի առաջնորդ Յան Հենդրիքս եպիսկոպոսի, Մայր Աթոռ Սուրբ Էջմիածնի ներկայացուցիչ Արքեպիսկոպոս Խաժակ Պարսամյանի, Ամստերդամի դեկան Էրիկ Ֆենիսի, ինչպես նաև նախաձեռնության հեղինակներից Վահան Ավագյանի՝ «Սուրբ Գրիգոր Նարեկացի Ամստերդամ» հիմնադրամի ղեկավարի և Համահայկական աշխարհագրական ընկերության նախագահ Ռաֆայել Հովհաննիսյանի ուղերձները։

Միջոցառման մասնակիցները կարևորել են հուշաքանդակի հոգևոր և պատմական խորհուրդը՝ ընդգծելով, որ այն ամրապնդում է հայ համայնքի և Ամստերդամի միջև մշակութային կապերը։ Նշվել է նաև, որ Նարեկացու պատկերը կրող հուշարձանը կծառայի որպես ուխտատեղի օտար երկրում բնակվող հայերի համար, ինչպես նաև կգրավի Նիդեռլանդներ ժամանող հայ զբոսաշրջիկների և տեղաբնակների ուշադրությունը։

Աղբյուրի համաձայն՝ հաշվի առնելով, որ Սուրբ Նիկողայոսի տաճարը գտնվում է քաղաքի սրտում, այցելուները հնարավորություն կունենան ծանոթանալու հայ մշակութային ժառանգությանը և մոմ վառելու՝ ի հիշատակ Նարեկացու անմահ գրականության։

«Այսօր մեր համայնքի սրտում մի նոր էջ է բացվում։ Սուրբ Գրիգոր Նարեկացին, իր համընդհանուր մարդասիրական ու հոգևոր ուղերձով, կմիացնի մշակութային կամուրջներ Հայաստանի և Նիդեռլանդների միջև», – ասել է Վահան Ավագյանը։

Միջոցառումն ավարտվել է հավատացյալների միասնական աղոթքով, որին հաջորդել է ավանդական մոմավառություն՝ Նարեկացու բարձրաքանդակ պատկերին։