ԿԳՄՍ նախարար․ Մխչյանի դպրոցում տեղի ունեցածը սարսափելի է.

PanARMENIAN.Net - ԿԳՄՍ նախարար Ժաննա Անդրեասյանը, անդրադառնալով Մխչյանի Քրիստափոր Ալավերդյանի անվան դպրոցում տեղի ունեցած միջադեպին, ասել է, որ տեղի ունեցածը սարսափելի է։

«Մխչյանի դպրոցում տեղի ունեցածը սարսափելի է, այլ բառեր չունեմ»,- նշել է նա, հայտնում է Panorama.am-ը։

Նա նշել է, որ այժմ քննություն է գնում։

«Հույս ունենք՝ քննության ավարտից հետո մենք կունենանք բոլոր հարցերի պատասխանները կոնկրետ դրվագի հետ կապված»,- ասել է Անդրեասյանը։

Նա ընդգծել է, որ նմանատիպ իրավիճակները անընդունելի են և միայն իրավապահ մարմինների ներգրավվածությունը բավարար չէ. անհրաժեշտ է խորությամբ հասկանալ, թե դպրոցն ինչ կանխարգելիչ քայլեր պետք է իրականացրած լիներ, ինչ օղակներ են գործել ըստ կանոնի և որոնք՝ ոչ։

«Նման դեպքերը տեղի չեն ունենում մեկ օրում, պարզապես, երբ տեղի են ունենում, որոշակի նշաններ երևում են, անհագստացնող ազդակներ են լինում։ Այն, ինչ տեղի է ունեցել, չպետք է կրկնվի, ամեն ինչ անենք, որ դա չկրկնվի»,- ասել է ԿԳՄՍ նախարարը։

Անդրեասյանը հավելել է, որ նախարարությունը պարբերաբար ստանում է ահազանգեր, երբ դպրոցների շրջակայքում նկատվում են կասկածելի երևույթներ, և իրենք անմիջապես կապ են հաստատում իրավապահ կառույցների հետ։

Մխչյանի բնակիչները պատմել են, որ Արարատի մարզի Մխչյան գյուղի Քրիստափոր Ալավերդյանի անվան դպրոցիբարձր դասարանների մի քանի տղաներ դպրոցի զուգարանում կապկպել են 4-րդ դասարանի երկու աշակերտի և ստիպողաբար թմրանյութ տվել: Դրանից հետո երեխաների մոտ կախվածություն է ի հայտ եկել, նրանք սկսել են տնից գումար գողանալ՝ կրկին նույն աշակերտներից թմրանյութ գնելու նպատակով։

Տեղի ունեցած դեպքով նախաձեռնվել է քրեական վարույթ Քրեական օրենսգրքի 258-րդ հոդվածի 2-րդ մասի 2-րդ, 5-րդ, 8-րդ կետերով (շորթումը, որը կատարվել է մի խումբ անձանց կողմից նախնական համաձայնությամբ անօգնական վիճակում գտնվողի նկատմամբ, անչափահասի նկատմամբ),4 անձի նկատմամբ հարուցվել է հանրային քրեական հետապնդում: